Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
AKTUALITET
2016–2024, Shqipëria me shitjet më të larta të makinave në rajonin ECA
PiranjatPërditësimi i fundit 9 Tetor 2025, 08:23
Shqipëria kishte nivelin më të lartë të shitjeve të automjeteve të reja ndër vendet e Europës dhe Azisë Qendrore (ECA), evidentoi një raport i fundit i Bankës Botërore për këtë rajon.
Shqipëria ka shënuar ndër rritjet më të mëdha të regjistrimeve të makinave të reja për 1,000 banorë në Europën dhe Azinë Qendrore gjatë vitit 2024, krahasuar me vitin 2016. Diferenca mes dy periudhave është shumë më e theksuar se në shumicën e vendeve të rajonit (shiko grafikun bashkëngjitur).
Ndërsa vende si Bosnja, Bullgaria apo Rumania kanë mbetur me ritme të ulëta të shitjeve, Shqipëria i është afruar vendeve si Kroacia dhe Polonia për numrin e regjistrimeve të makinave të reja për frymë.
Në anën tjetër, të dhënat ne Turqi tregojnë se shitjet e makinave hibride dhe elektrike po rriten me ritme të shpejta, duke shtyrë tregun drejt mjeteve më të pastra. Për vitin 2025, pjesa e këtyre mjeteve në totalin e shitjeve është rritur ndjeshëm krahasuar me një vit më parë, ndërsa makinat me naftë kanë pësuar rënie të vazhdueshme.
Mosha mesatare e makinave në Shqipëri është ndër më të lartat në Europë. Shumë drejtues po zëvendësojnë automjetet e vjetra me modele më të reja, më ekonomike dhe më pak ndotëse, sidomos për shkak të kostove në rritje të karburanteve dhe mirëmbajtjes.
Në vitet e fundit, qeveria ka bërë disa ndryshime në taksat për automjetet hibride dhe elektrike, duke ofruar përjashtime ose ulje të detyrimeve doganore.
Paralelisht, çmimet ndërkombëtare të makinave të përdorura (sidomos nga BE-ja) kanë qenë më të ulëta pas pandemisë, duke e bërë importin më të favorshëm.
Rritja e turizmit, veçanërisht pas vitit 2021, ka ndikuar drejtpërdrejt edhe në kërkesën për makina, sidomos nga flotat e kompanive që operojnë në sektorin e qiradhënies.
Për shkak të problematikave që ka transporti publik, vitet e fundit ka evoluar shumë biznesi i taksive. Ky biznes, sidomos në Tiranë, është zgjeruar shpejt me flota makinash hibride ose elektrike.
Kërkesa për shërbimin taksi u rrit sidomos për transferimet nga aeroporti në kryeqytet ose edhe në vende të tjera turistike, ku nuk mundësohet transporti publik. Për të njëjtat arsye, në vendin tonë ka lulëzuar edhe biznesi i makinave me qira.
Mungesa e transportit hekurudhor dhe thyerja e fortë gjeografike e vendit kanë bërë që shumë turistë dhe emigrantë, kur vijnë në vendin tonë, t’i drejtohen qiramarjes së automjeteve.
Megjithë rritjen e viteve të fundit, Shqipëria ende ka një nivel të ulët motorizimi në krahasim me vendet e tjera të Europës./Monitor
