Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
AKTUALITET
6 vite më vonë, zbulimi epokal: Depozitat ende mbi pallate – Rama 'risjell' vendimin e harruar
PiranjatPërditësimi i fundit 3 Shtator 2025, 15:44
Qeveria “riciklon” vendimet e pushtetit vendor, duke rikthyer vëmendjen tek vendimi i Këshillit Bashkiak nr. 150, datë 16.12.2019, i cili parashikonte që depozitat e ujit të vendosura në tarracat e pallateve në kryeqytet do të hiqeshin — një vendim që nuk u zbatua kurrë.
Kryeministri Edi Rama është shprehur, gjashtë vite më pas, se ka ardhur koha që të ndërhyhet:
“Koha të vijojmë me planin e heqjes së depozitave, që janë kthyer në pesha të jashtëzakonshme mbi pallatet e ndërtuara shumë kohë më parë dhe që mund të kthehen në burim katastrofash. Heqja e depozitave duhet t’ua shpjegojmë njerëzve si një mënyrë për të përmirësuar furnizimin me ujë,” tha ai.
Faza e dytë e reformës për menaxhimin e ujit do të shoqërohet edhe me një plan masash ndaj abuzuesve. Gjatë prezantimit të Operatorit Kombëtar të Ujit, kreu i qeverisë theksoi se do të ndërhyhet për të ndalur abuzimet, të cilat lidhen kryesisht me qëllime fitimi, siç janë lavazhet. Sipas Ramës, qytetarët që nuk abuzojnë, do të përfitojnë një shërbim më të drejtë dhe të barabartë.
“Uji në qiell është një gjë, ndërsa uji në rubinet është tjetër gjë. Në momentin kur futet në sistem, ai nuk është më prodhim natyror, por prodhim i njeriut. Uji është një mall jetik që grumbullohet, shpërndahet, shitet dhe blihet. Prandaj, kërkon operim kombëtar. Për këtë arsye, nisim fazën e dytë të reformës.
Nga faza e parë janë lidhur në rrjet rreth 100 mijë përdorues të rinj dhe është prerë një numër i konsiderueshëm lidhjesh të paligjshme. Jemi të qartë për hapat që do të ndjekim — nga prodhimi, tek shpërndarja dhe furnizimi — ashtu siç kemi vepruar edhe me energjinë.
Por ndryshe nga energjia, ku abuzimi ndodh shpesh nga qytetarët, në rastin e ujit kemi abuzime për përfitime financiare: lavazhe nëpër lagje, derdhje të ujit në rrugë kombëtare, dhe lidhje të paligjshme nëntokësore. Këta do të jenë në shënjestër të planit të masave, që qytetarët e ndershëm të kenë furnizim të rregullt dhe të drejtë,” përfundoi Rama./Piranjat.al
