Të shtëna me armë zjarri janë regjistruar mesditën e kësaj të hëne në zonën e Kamzës.
Një 26-vje&...
AKTUALITET
Arrestohet në Spanjë shqiptari i shumëkërkuar, fshihej me dokumente të falsifikuara
PiranjatPërditësimi i fundit 21 Nëntor 2025, 19:54
Një qytetar shqiptar i shpallur në kërkim ndërkombëtar është arrestuar në qytetin Vigo të Spanjës, ku fshihej prej muajsh duke përdorur identitet të rremë kroat.
Policia Kombëtare spanjolle konfirmoi se ndaj tij ishte lëshuar një urdhër-arresti nga Gjykata e Posaçme Kundër Korrupsionit dhe Krimit të Organizuar të Shqipërisë, në kuadër të hetimeve për trafik droge dhe pjesëmarrje në grup të strukturuar kriminal. I dyshuari përballet me një dënim maksimal deri në 30 vite burg.
Arrestimi u krye nga agjentët e GOPD (Grupi Operativ i Parandalimit të Delikuencës) të Komisariatit Vigo-Redondela, pasi gjatë një kontrolli rutinë ai u identifikua me dokumente të falsifikuara si shtetas kroat. Pas verifikimeve të mëtejshme, policia konstatoi se personi rezultonte i shpallur në kërkim nga Interpoli që prej majit të këtij viti.
Sipas autoriteteve, çështja që e rëndon i rikthehet ngjarjeve të shtatorit 2020, kur i arrestuari kishte zhvilluar komunikime të koduara me dy trafikantë të tjerë lidhur me një sasi droge të destinuar për tregun italian. Detyra e tij ishte të analizonte një mostër të lëndës narkotike përpara se dërgesa të nisej drejt Italisë.
Hetimet e SPAK në atë periudhë zbuluan gjithashtu se, gjatë një kontrolli në banesën e tij në Shqipëri, autoritetet kishin sekuestruar 100 gramë heroinë dhe pajisje elektronike për bllokim sinjali, çka çoi në vendosjen e tij në arrest shtëpie.
Megjithatë, ai kishte ndërmarrë masa për të fshehur drogën dhe për të vazhduar aktivitetin kriminal, para se të arratisej jashtë vendit për t’iu shmangur gjykimit.
Autoritetet spanjolle dyshojnë se i arrestuari fshihej në zonën e Rías Baixas duke shfrytëzuar praninë e konsiderueshme të elementëve kriminalë nga Ballkani që operojnë në Galici dhe në Spanjë, fenomen që është evidentuar edhe në operacione të fundit antidrogë të kryera në Pontevedra.
I dyshuari pritet të dalë para drejtësisë spanjolle, nga ku më pas do të nisë procedura e ekstradimit drejt Shqipërisë.
