Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
AKTUALITET
"Asnjë justifikim, bashkë kundër dhunës ndaj grave dhe vajzave”, fillojnë 16 ditët e aktivizmit kundër dhunës me bazë gjinore
n.fPërditësimi i fundit 25 Nëntor 2024, 22:16
Foto
TIRANË- Në Shqipëri nisën sot 16 Ditët e aktivizmit kundër dhunës me bazë gjinore, të cilat këtë vit zhvillohen me moton “Asnjë justifikim, bashkë kundër dhunës ndaj grave dhe vajzave”. Siç njofton korrespondenti i Zërit të Amerikës, Pëllumb Sulo, në Shkodër shoqatat joqeveritare që mbrojnë të drejtat e grave u bënë thirrje qytetarëve të bashkohen me mesazhet kundër dhunës me bazë gjinore.
16 ditët e aktivizmit kundër dhunës me bazë gjinore nisën sot në Shkodër me një falenderim për të gjitha gratë dhe vajzat që, ndër vite, kanë mbështetur kauzën kundër dhunës me bazë gjinore, duke luftuar fort për të mbrojtur të drejtat e tyre. Qendra e gruas “ Hapat e lehte” ftoi qytetarët që të shkruajnë mesazhe kundër dhunës me bazë gjinore në përpjekje për rritjen e shkallës së ndërgjegjësimit. Drejtuesja e kësaj qendre, Denada Shpuza, thotë se këtë vit fushata 16 ditore e aktivizmit zhvillohet me sloganin “ Asnjë justifikim: Bashkë kundër Dhunës ndaj Grave dhe Vajzave”.
“ Ne sot numërojmë rreth 3 mijë gra dhe vajza, të mbështetura në 21 vite histori. Është një shifër shumë e madhe. Megjithatë, shpresoj që kjo shifër të mos rritet nga viti në vit. Përkundrazi, të vijnë duke u ndalur. Fakti që kemi një shifër kaq të madhe nuk do të thotë se ky është numri real i grave dhe vajzave të dhunuara. Mund të jenë edhe shumë më tepër gra dhe vajza, të cilat mund të kenë nevojë për mbështetje dhe që akoma nuk e kanë marrë hapin për të denoncuar dhunën”.
Në përpjekje për të rrritur shkallën e ndërgjegjësimit të komuniteteve lokale dhe institucioneve shtetërore, shoqata “Gruaja tek Gruaja” së bashku me shoqatën “Burra dhe Djem”, përmes dokumentarit “Përtej heshtjes” sollën sot, në nisje të 16 ditëve të aktivizmit, historinë e një nëne të dhunuar, histori e ngjashme me ato të shumë grave që përjetojnë dhunë brenda familjes.
“ Nga janari i këtij viti, deri tani në nëntor, thotë drejtuesja e shoqatës ,Trëndelina Boriçi, në qendrën tonë janë trajtuar 330 raste, raste që vijnë për herë të parë në qendrën tonë. Këtu nuk llogariten rastet e përsëritura, të cilat vazhdojnë të ndihmohen me ndihmën juridike apo psikologjike si dhe orientimin drejt institucioneve të tjera”.
Përfaqësueset e shoqatave joqeveritare, që mbështesin gratë dhe vajzat në përpjekjet e tyre për të dalë nga spiralja e dhunës, thonë se nga viti në vit gratë po ndërgjegjësohen për të denoncuar rastet e dhunës brenda familjes, mbështetur edhe nga përmirësimet ligjore që janë bërë vitet e fundit. Trëndelina Boriçi thotë se “ Dhuna me bazë gjinore ushtrohet kryesisht brenda mureve të shtëpisë ose në mjedise të mbyllura. Ato mure nuk kanë zë për fat të keq. Ama gruaja ka zë, vajza ka zë. Dhe nuk duhet të pranojë, por duhet ta denoncojë dhunën, të flasë dhe të shkëputet nga kjo situatë duke shkuar aty ku mendon se mund t’i jepet një ndihmë profesionale edhe e menjëhershme”.
16 ditët e aktivizmit kundër dhunës me bazë gjinore do të shtrihen në të gjitha bashkitë e Shqipërisë me pjesëmarrjen e organizatave të shoqërisë civile dhe institucioneve publike, për të sjellë në vëmendje nevojën e shtimit të përpjekjeve për rritjen e ndërgjegjësimit për t’i dhënë fund dhunës me bazë gjinore./ VOA
