Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Banka Qendrore Europiane ul normat e interesit me një çerek pikë në 3%
n.fPërditësimi i fundit 12 Dhjetor 2024, 16:04
Foto ilustruese
TIRANË- Banka Qendrore Europiane (BQE) ka ulur normën e depozitave për herë të katërt këtë vit, me 25 pikë bazë në 3%. Hapi ishte parashikuar gjerësisht nga tregu, me ulje të mëtejshme në horizont në vitin 2025. BQE filloi uljen e normave të interesit në qershor 2024, për të nxitur ekonominë në stanjacion të Eurozonës, përmes normave më të ulëta për të inkurajuar huamarrjen, shpenzimet dhe investimet.
Dy normat e tjera të interesit të BQE-së u ulën gjithashtu: normat e reja të interesit u ulën në 3.15% për operacionet kryesore të rifinancimit (për bankat që marrin hua fonde nga BQE në baza javore) dhe 3.4% për kredinë marxhinale (kredi njëditore për bankat kundrejt kolateralit).
Ndërsa inflacioni i afrohet objektivit prej 2% të BQE-së, ka më shumë fokus në rritjen e dobët të vazhdueshme të Eurozonës. Blloku pritet të rritet me 0.8% këtë vit dhe 1.3% vitin e ardhshëm, sipas parashikimeve të komisionit ekzekutiv të BE.
Pas uljes së shumëpritur, të gjithë sytë janë drejtuar te konferenca për shtyp e Presidentes së BQE-së Christine Lagarde, pasi rreziqe të reja janë shfaqur që nga takimi i fundit i bankës më 17 tetor, duke përfshirë trazirat politike në dy ekonomitë më të forta të Eurozonës dhe rezultatet e zgjedhjeve në SHBA.
Investitorët po shohin shenja se çfarë norme po synon BQE dhe gjithashtu se çfarë norme inflacioni dhe parashikimesh ekonomike po bën banka qendrore për të formësuar politikën e saj monetare në vitin 2025.
Inflacioni në SHBA rritet, pritet një ulje tjetër e normës së interesit
Inflacioni në SHBA u rrit lehtë në 2.7% në nentor, treguan shifrat zyrtare. Pavarësisht rritjes, çmimet po rriten shumë më ngadalë se në qershor 2022, kur pushtimi rus i Ukrainës shkaktoi trazira në tregjet globale të naftës dhe rriti çmimet e karburantit.
Ndonëse progresi është shfaqur në të dhënat ekonomike prej muajsh, pakënaqësia ekonomike ka mbetur e lartë, pasi rritja e çmimeve në fusha të tjera, si banesat, errësoi përmirësimin më të gjerë.
Çështja luajti një rol kyç në zgjedhjet amerikane, duke ndihmuar Donald Trump të fitojë rizgjedhjen në Shtëpinë e Bardhë muajin e kaluar. Banka qendrore e SHBA uli normat e interesit për herë të parë në më shumë se katër vjet në shtator, duke përmendur zhvillimin ekonomik, që stabilizoi çmimet.
Shumë analistë ende presin që zyrtarët të njoftojnë një tjetër ulje të normave të interesit në takimin e tyre këtë muaj, por ata kanë paralajmëruar se normat ka të ngjarë të qëndrojnë më të larta se sa pritej më parë vitin e ardhshëm./ Monitor
