Detaje të reja janë zbardhur nga ngjarja e rëndë në Maliq. Mësohet se në momentin e arrestimit, autori Violand Braçe...
AKTUALITET
Birra e importit “mbyt” tregun vendas edhe për janar 2025
n.fPërditësimi i fundit 11 Mars 2025, 12:58
TIRANË- Ndonëse muaji janar nuk karakterizohet për konsum të lartë të birrës, pesha e birrave të huaja në këtë periudhë është rritur në tregun vendas. Për muajin janar 2025 sipas të dhënave të Doganave u importuan 3,2 mln litra birrë. Krahasuar me muajin janar të vitit paraardhës, sasia e importeve u rrit 35%. Nga 53% në muajin janar 2024, pesha e tyre në janar 2025 arriti në 56%.
Për 2024, birra e importit zuri 61% të tregut bazuar në të dhënat e Doganave për prodhimin dhe importin. Totali i importeve u shtua 7%. Prezenca e lartë e birrave të huaja në treg evidentohet edhe nga prodhuesit vendas. Administratori i fabrikës së prodhimit të birrës së markës “Kaon” Artan Stroka tha se në supermarkete ka një dyndje të markave të huaja të birrës.
Numri i tyre shtohet nga viti në vit, sipas tij pasi çmimet e shitjes së birrës së importit janë më të lira sesa prodhimi vendas.
“Në supermarkete çmimi për kanoçe birrë vendase varion nga 95 deri 100 lekë kundrejt 79 deri 89 lekë për kanoçe që shitet birra e importit. Për shkak të kostove të larta, veçanërisht nga rritja e akcizës e kemi të pamundur të konkurrojmë në çmime”, thotë ai.
Zoti Stroka nënvizon se edhe me nisjen e sezonit turistik nuk pritet të këtë rritje të ndjeshme të kërkesës, pasi prodhuesit vendas nuk janë në gjendje të përballojnë konkurrueshmërinë në çmime nga kostot e larta të akcizës.
Edhe Xhim Begeja, drejtues i Shoqatës së Mikro Birrave Artizanale Shqiptare, njëkohësisht operator i vogël në treg i birrës “Puka”, me kapacitet prodhues 700 deri në 750 litra në ditë, vijon të pohojë me shqetësim se prodhimi artizanal është drejt zhdukjes nga kostot e larta pas dyfishimit të akcizës.
Begeja pohon se rëniet e prodhimit për secilin operator në 2024 variojnë nga 8 deri 10% krahasuar me 2023, teksa mbetet shqetësim rënia e konsumit për shkak të çmimeve më të lira që ofrohen nga importuesit e birrave.
Nga 1 janari 2023 kompanitë shqiptarë po paguajnë dyfishin e akcizës së birrës. Ndryshimi i akcizës rriti edhe 22% kostot e prodhuesve, që prej kohësh vuanin shtimin e kostove nga shtrenjtimi i lëndës së parë të birrës malto, materialeve ambalazhuese dhe rritja e rrogave të punonjësve.
Prodhimi i vendit para ndryshimeve fiskale ka qenë i tarifuar me 360 lekë/HL për prodhuesit nën 200,000 Hl, ndërsa për prodhimin mbi këtë nivel akciza ishte 710 lekë. Pas ndryshimeve në ligjin “Për akcizat në Republikën e Shqipërisë”, taksa u unifikua në 710 lekë të prodhuesve nën dhe mbi 200,000 Hl, si vendas dhe të huaj.
Nga mospërballimi i kostove për gati 3 muaj në 2023, disa fabrika mbyllën përkohësisht prodhimin. Ndërsa në fund të 2024-s fabrika e birrës Stela e themeluar që në vitin 1994, për shkak të humbjeve financiare dhe vështirësive për të mbuluar kostot operacionale pas rritjes së akcizës, u shit te kompania e importit të pijeve “Eurolab Internacional Grup”./ Monitor
