Kryetari i PD-së, Sali Berisha i bëri thirrje maxhorancës të anulojë një anti-miting të paralajmëruar për ta mbaj...
AKTUALITET
Buxheti 2025, marsi dhe dhjetori me arkëtimet më të larta
n.fPërditësimi i fundit 14 Mars 2025, 12:37
TIRANË- Arkëtimet buxhetore po ndjekin ciklin e ekonomisë. Plani i detajuar i shpërndarjes se të ardhurave buxhetore tregon se arkëtimet më të larta do të jenë në mars dhe në dhjetor, me nga 67 dhe 70 miliardë lekë se secila.
Shpërndarja mujore e buxhetit të këtij viti tregon se arka e shtetit do të rrisë arkëtimet në vlerë në gjysmën e dytë të vitit, duke u përshtatur me ciklin ekonomisë ku aktiviteti i konsumit dhe investimeve intensifikohet në këtë periudhë.
Të dhënat tregojnë se në krahasim me vitin e kaluar ka një rritje më të madhe të planit të arkëtimeve për muajt e parë të vitit. Për muajin janar 2025 ishin programuar të arkëtoheshin 62 miliardë lekë me rritje 13.6% nga janari 2024, por në fakt u arkëtuan mbi 64 miliardë lekë ose 18.5 për qind më shumë se fakti i vitit të kaluar. Arkëtimet e janarit u nxiten nga një rritje e pazakonte e importeve të akcizës.
Në janar prill 2025 janë programuar që çdo muaj të arkëton rreth 13 për qind më shumë se e njëjta periudhë e vitit 2024. Teksa nga maji në dhjetor arkëtimet do të rriten më pak se 10 për qind. Praktikat e viteve të fundit tregojnë se programi buxhetor mund të ndryshojë disa herë brenda vitit.
Vitet e fundit ndryshimet kanë favorizuar miratimin e buxheteve shtesë, pasi të ardhurat janë rritur mbi parashikimit si rrjedhojë e zhvillimeve pozitive në turizëm të cilat kanë ndikuar në rritjen e përgjithshme të konsumit në ekonomi.
Teksa programi i të ardhurave buxhetore ka ecur përgjithësisht në mirë se plani, nga ana tjetër buxheti po vuan paaftësinë për të shpenzuar sipas programit fondet publike.
Edhe viti 2024 u mbyll me një mos realizim jo të zakontë të programit të shpenzimeve publike. Me ndryshimet e fundit në aktin normativ për vitin 2024 ishin planifikuar për t’u shpenzuar 771,3 miliardë lekë, por u realizuan vetëm 728.5 miliardë lekë ose 42.7 miliardë lekë më pak se plani.
Mosrealizimi sipas planit të shpenzimeve vjen në një kohë kur nevojat ekonomisë shqiptare për financime janë të larta. Vendi ynë ende ka hendek të lartë në infrastrukture në krahasim me Rajonin dhe gjithashtu ka pensione dhe paga më të ulëta ne raport me fqinjët. Shpenzimet e Shqipërisë për shëndetësinë dhe arsimin janë më të ulëtat në Europë në raport me PBB-së./ Monitor
