Kreu i grupit të PS-së, Taulant Balla, gjatë një prononcimi për gazetarët pas mbledhjes së Kuvendit ka folur për protest...
AKTUALITET
Dalin nga burgu dy personat e arrestuar për vrasje me dashje të Egli Progës
PiranjatPërditësimi i fundit 18 Nëntor 2025, 08:39
Egli Proga
Pas 15 muaj qëndrimi në ambjentet e paraburgimit të Drenovës, Gjykata e Korçës, vendosi tre ditë më parë të zbusë masën e sigurisë ndaj dy të arrestuarve, Leonidha Guçe dhe Denis Meçe, të cilët akuzohen për veprën penale të “Vrasjes me dashje” ndaj Eglantin Progës.
Ngjarja ndodhi në 13 Gusht 2024 në qytetin e Pogradecit, ndërsa tashmë dy personat kryesorë të këtij krimi, kanë përfituar daljen nga burgu për shkak të parashkrimit të afateve të qëndrimit në paraburgim.
Siç mëson gazetari Elton Qyno, ditën e shtunë Gjykata e Korçës, vendosi të zbusë masën e sigurisë nga “Arrest në burg” në “Arrest shtëpie” për dy personat e mësipërm, pasi afatet e paraburgimit të tyre në burgun e Drenovës kishin mbaruar.
Aktualisht prokuroria e Korçës që po kryen hetime, po pret të njihet me konkluzjonin e aktin të ekspertimit të DVR-së, ku disa prej pamjeve filmike janë fshirë dhe ende nuk janë rikuperuar.
Kjo çështje fillimisht shkoi në gjyq me disa të pandehur përfshirë dhe Leonidha Guçen, Denis Meçen, por pas dëshmisë së këtij të fundit në ambjentet e prokurorisë Korçë, çështja u rikthye sërisht për rihetim, duke kryer disa verifikime të tjera, mes të cilave dhe një kërkesë për ekspertim të DVR-së në një laborator kompjuterik në Itali.
Ngjarja e rëndë e ndodhur në muajin Gusht në Pogradec, ku mbeti i vrarë Elgi Proga, çoi në arrestimin dhe të 2 personave të tjerë të cilët akuzohen për “Moskallëzim krimi” dhe “Veprime që pengojnë zbulimin e të vërtetës”.
Fillimisht në pranga ranë dhe më pas u liruan nga gjykata personat si Voltan Shkulaku, Arjan Manellari, të cilët sipas akuzës nuk kanë treguar detajet e konfliktit dhe goditjes me grusht që i bëri Denis Meçe, Eglantin Progës.
Për më tepër hetimet e zhvilluara gjatë kësaj kohe kanë nxjerrë të dhëna të tjera se 2 personat janë përfshirë në fshirjen e pamjeve filmike të lokalit ku ndodhi ngjarje, duke sjellë pengimin e hetimeve.
Fshirja e pamjeve filmike nga DVR-të e dy lokaleve ku ka qëndruar viktima para se të vritej, është kryer në mënyrë të qëllimshme.
Disa nga pamjet filmike janë rikuperuar vetëm pasi Prokuroria dhe Policia e Korçës, kontraktuan një ekspertët privat, i cili përmes programeve ka mundur të rikuperojë pamjet filmike të fshira.
Për hetimin e këtij rasti kaq kompleks dhe që tronditi opinionin publik policia dhe prokuroria e Korçës, kërkuan ndihmën dhe të laboratorit kibernetik në SPAK, por kjo prokurori refuzoi të japë asistencën teknike.
Sipas një ekspertize të mjekësisë-ligjore, vdekja e Eglantin Progës, në mesin e muajit Gusht në Pogradec, ka ardhur si pasojë e hemorragjisë në cipën e trurit dhe hemorragjisë në indin trunor.
Ky është konkluzioni përfundimtar që kanë dalë dy ekspertët e mjekësisë-ligjore Gjergji Kaçauni dhe Klevis Shella, të cilët pas dy javë ekzaminimi dolën në përfundimin se 42-vjeçari Proga, ka ndërruar jetë si pasojë e goditjes me grusht.
Sipas ekspertizës, në pikën dy të konkluzionit dy ekspertët dalin në përfundimin se viktima Eglantin Proga, ka gërvishtje në fytyrë, dëmtim ky që mund të jetë shkaktuar me mjet të fortë mprehës siç mund të jetë dhe goditja e tij me grusht.
Por krahas ekspertizës mjeko-ligjore Eglantin Progës i është kryer dhe analiza e toksikologjisë, ku ekspertja Mirnela Cinije doli në përfundimin se Proga kishte konsumuar alkool në masën 2.82 g/l.
Ngjarja e rëndë që tronditi vendin ndodhi si pasojë e një shakaje që më pas u shoqërua me fyerje të rënda në ambientet e një lokali, mes dy të njohurve në Pogradec, ku për pasojë babai i dy fëmijëve Eglantin Proga ka humbur jetën.
Ngjarja solli një dallgë akuzash të adresuara nga opinioni publik dhe media në drejtim të komisariatit të Pogradecit dhe prokurorisë së Korçës, mbi mënyrën e trajtimit të këtij rasti duke e quajtur ngjarjen si aksidentale.
Në fakt pas shakave të bëra dhe më tej me kalimin në sharje dhe ofendim, ka qenë një goditje me grusht që autori i krimit Denis Meçe, i ka dhënë Eglantin Progës, i cili është rrëzuar në trotuar duke gjetur vdekjen e menjëhershme.
