Lufta Shtetet e Bashkuara-Iran po zhvillohet gjithnjë e më shumë në det, me të dyja palët që synojnë cisterna nafte dh...
AKTUALITET
Dyshime të reja për vdekjen e 21-vjeçarit shqiptar, del dëshmia për një makinë të dytë
PiranjatPërditësimi i fundit 18 Qershor 2026, 17:53
Ngjarja tragjike që i mori jetën 21-vjeçarit shqiptar Samir Fermaca në Itali, po merr një tjetër kthesë, teksa një dëshmi e re hedh dyshime mbi dinamikën e aksidentit.Fillimisht u mendua se gjithçka ishte e qartë për mënyrën si i riu humbi jetën, por tani në skenë ka dalë një dëshmitar okular, i cili pretendon se në aksident mund të jetë përfshirë edhe një automjet i dytë që u largua nga vendi i ngjarjes.
Ngjarja ndodhi mëngjesin e së shtunës, më 13 qershor, në një rrugë rrethore, ku 21-vjeçari po udhëtonte si pasagjer në motorin që drejtohej nga kushëriri i tij 26-vjeçar.
Sipas rindërtimit fillestar, dy të rinjtë ishin nisur nga semafori i Campagnola-s në drejtim të autostradës A4, kur u parakaluan nga një SUV Audi. Gjatë rikthimit në korsi, drejtuesi i makinës u kishte prerë lehtë rrugën.
Kjo solli reagimin e kushëririt, i cili e ofendoi drejtuesin e SUV-it dhe më pas e parakaloi nga e djathta. Në momentin kur mjeti dhe motori ishin paralel, 21-vjeçari goditi me këmbë pasqyrën e makinës, duke bërë që motori të humbiste ekuilibrin.
Si pasojë, ai ra në asfalt dhe mbeti pa ndjenja, ndërsa kushëriri u ngrit pa lëndime.
Megjithatë, prokurorja Giulia Angeleri ka ngritur dyshime për momentet e fundit para vdekjes së të riut. Deri tani, bazuar në dëshmitë e kushëririt dhe drejtuesit të SUV-it, në një zonë ku mungojnë kamerat e sigurisë, besohej se viktima kishte goditur kokën në asfalt.
Por një dëshmitar tjetër, që po udhëtonte pas tyre, pretendon se një makinë e dytë kaloi shumë pranë 21-vjeçarit ndërsa ai ishte i shtrirë në rrugë.
Për këtë arsye, prokuroria ka urdhëruar kryerjen e autopsisë, për të verifikuar nëse automjeti tjetër mund të ketë ndikuar në vdekjen e tij, qoftë edhe duke e prekur lehtë.
Autopsia pritet të kryhet në mënyrën më pak invazive të mundshme, për të lejuar edhe dhurimin e organeve të viktimës.
