Një 23-vjeçar në Korçë, i cili duhej të qëndronte në arrest shtëpie, është kapur nga policia pas di...
AKTUALITET
Ekstradimi i 2 kushërinjve të dënuar për vrasje në Itali, Policia del me njoftim zyrtar: Roma i kishte ndër 100 personat më të kërkuar!
PiranjatPërditësimi i fundit 20 Mars 2026, 20:01
Policia e Shtetit konfirmoi sot (20 mars) ekstradimin drejt Italisë të 2 kushërinjve nga Dibra, të dënuar në Napoli me mbi 14 vite burgim secili, për një vrasje të kryer në Caserta në vitin 1999, pas konflikteve mes grupeve rivale për territor.
Burime zyrtare bënë me dije se Interpol Tirana i dorëzoi në pranga Romës nëpërmjet një fluturimi nga Rinasi drejt Fiumicinos, të shumëkërkuarit Andon allias Afrim Sina dhe Niko allias Faslli Sina, 52 dhe 49 vjeç, të dy me nga dy identitete.
Ata ishin në listën e 100 personave më të kërkuar të Italisë, ndërsa u arrestuan vjet në Dibër, gjatë një aksioni në kushte të vështira terreni e moti.
“Ekstradohen drejt Italisë dy shtetas të dënuar për vrasje, të kapur në Dibër në mars 2025, gjatë operacionit policor të koduar “Difficult Conditions”, i zhvilluar në kushte të vështira terreni dhe moti. Dy kushërinjtë, të renditur në listën e 100 personave më të kërkuar në Itali, të cilët prej vitit 1999 fshiheshin në Dibër dhe përdornin identitete të tjera”, thuhet në njoftimin zyrtar.
Operacioni për kapjen e tyre u zhvillua nga Drejtoria e Forcës së Posaçme Operacionale, në Departamentin e Policisë Kriminale, në Policinë e Shtetit, në bashkëpunim të ngushtë me Zyrën e Ekspertit për Sigurinë në Shqipëri dhe Shërbimin për Bashkëpunimin Ndërkombëtar të Policisë.
Njoftimi i Policisë së Shtetit:
“Në përfundim të procedurave për ekstradim, ditën e sotme, nga Interpol Tirana, u ekstraduan drejt Italisë shtetasit:
-Andon (alias Afrim) Sina, 52 vjeç;
-Niko (alias Faslli) Sina, 49 vjeç, të dy banues në fshatin Rreth-Kalë, Dibër.
Këta shtetas janë dënuar me vendim të formës së prerë nga Gjykata e Apelit e Napolit, në Itali, në vitin 2006, me nga 14 vjet e 11 muaj burgim secili, për veprat penale “Vrasja me dashje e kryer në bashkëpunim” dhe “Vrasja e mbetur në tentativë”.
Në komunën Gricignano d’Aversa, më datë 22.09.1999, kanë vrarë me sende të forta dhe mjete prerëse shtetasin shqiptar B. C. dhe kanë plagosur rëndë shtetasin shqiptar F. S., për arsye të lidhura me ndarjen e të ardhurave nga aktivitete të paligjshme”.
