Ministria e Mbrojtjes informon se gjatë 24 orëve të fundit (nga ora 09:00 e datës 8 shtator deri në orën 09:00 të datë...
AKTUALITET
"Gati të japim jetën për Shqipërinë", qytetarët ‘ndezin’ sheshin: Çohuni shqiptarë, ta ndryshojmë këtë vend
PiranjatPërditësimi i fundit 5 Qershor 2026, 20:26
Protesta e gjashtë radhazi kundër projektit në Zvërnec dhe politikave të qeverisë është zhvilluar këtë mbrëmje para Kryeministrisë, ku qytetarë, aktivistë dhe përfaqësues të shoqërisë civile kanë vijuar kundërshtimin e tyre përmes pankartave, thirrjeve dhe fjalimeve publike.
Ndryshe nga ditët e para, tubimi i sotëm është karakterizuar nga tone më të forta politike, me pjesëmarrësit që kanë akuzuar qeverinë për keqqeverisje dhe shpërfillje të interesit publik.
Mes deklaratave që tërhoqën më shumë vëmendje ishte edhe thirrja e një protestuesi, i cili u shpreh se beteja për mbrojtjen e vendit dhe ndryshimin politik kërkon angazhim maksimal qytetar.
“Po qe se do të vdesim, të vdesim sot për Shqipërinë dhe ta çlirojmë nga keqqeverisja”, deklaroi ai para protestuesve të mbledhur në shesh.
Gjatë protestës u bënë thirrje edhe për zgjerimin e pjesëmarrjes qytetare në tubimet e ardhshme. Një tjetër protestues kërkoi që reagimi të mos mbetet vetëm te aktivistët, por të përfshijë më gjerë qytetarët që, sipas tij, janë prekur nga emigracioni dhe situata ekonomike në vend.
“Çohuni shqiptarë, çohuni në shesh, ta ndryshojmë Shqipërinë për njerëzit që kanë ikur emigrantë dhe janë detyruar ta lënë vendin”, tha ai, mes duartrokitjeve të të pranishmëve.
Protestuesit kanë deklaruar se nuk do të tërhiqen nga kërkesat e tyre, të cilat përfshijnë anulimin e projektit në Zvërnec, shfuqizimin e disa ndryshimeve ligjore që lidhen me investimet strategjike dhe zonat e mbrojtura, si dhe largimin e qeverisë.
Tubimi i sotëm është i gjashti radhazi para Kryeministrisë dhe vjen në një kohë kur kundërshtimi ndaj projektit në Zvërnec po shtrihet edhe në qytete të tjera të vendit, duke marrë gjithnjë e më shumë përmasa kombëtare.
