Personi në foto, efektivi i ‘Shqiponjave’ Edison Adri, i cili mbeti i plagosur gjatë operacionit policor të zhvilluar në zon&e...
AKTUALITET
Gjashtë kandidatë për postin e kryetarit të Bordit të AMF
r.llPërditësimi i fundit 30 Dhjetor 2024, 07:51
foto ilustruese
TIRANË- Gjashtë kandidatë kanë aplikuar në Kuvendin e Shqipërisë për pozicionin vakant të kryetarit të Bordit të Autoritetit të Mbikëqyrjes Financiare (AMF). Sipas burimeve të “Monitor”, kandidatët janë Artur Ribaj, Emis Cerava, Julian Naqellari, Petrit Perhati, Saimir Tola dhe Valbona Sanxhaktari.
Ndër kandidatët, Artur Ribaj është i vetmi që ka pasur një përvojë të mëparshme në institucionet rregullatore të tregut financiar, fillimisht në Departamentin e Mbikëqyrjes të Bankës së Shqipërisë dhe më pas si drejtues i Departamentit të Mbikëqyrjes në AMF.
Kandidati Emis Cerava është me profesion ekonomist dhe mban postin e Sekretarit të përgjithshëm të Këshillit të Lartë të Prokurorisë.
Julian Naqellari është ekspert kontabël i autorizuar dhe pedagog i kontabilitetit në Fakultetin e Ekonomisë të Universitetit të Tiranës.
Kandidatja Valbona Sanxhaktari është juriste dhe anëtare e Komisionit të Pavarur të Kualifikimit për vettingun e gjyqtarëve dhe prokurorëve.
Aplikantët Petrit Perhati dhe Saimir Tola nuk rezultojnë të kenë përvojë të mëparshme në pozicione të rëndësishme në sektorin publik.
Burimet bëjnë të ditur sa kandidatura favorite për t’u mbështetur nga mazhoranca në garë është Valbona Sanxhaktari.
Kuvendi i Shqipërisë rihapi në mesin e muajit nëntor aplikimet për pozicionin e anëtarit të Bordit të Autoritetit të Mbikëqyrjes Financiare, që do të mbajë edhe postin e kryetarit. Rihapja e vendit vakant erdhi pasi në 17 tetor deputetët rrëzuan në seancë plenare kandidaturën e vetme të propozuar nga Komisioni Ekonomisë dhe Financave, atë të Pajtim Melanit.
Fillimisht, ky pozicion ishte shpallur vakant nga Kuvendi i Shqipërisë më datë 22 korrik, pas përfundimit të mandatit të Olsi Çokut.
Më datë 8 tetor, Komisioni Kuvendor i Ekonomisë shqyrtoi dhe miratoi Pajtim Melanin si kandidat të vetëm për këtë pozicion, duke e propozuar për votim në seancë plenare. Megjithatë, kandidatura e Melanit u rrëzua në votim.
Mbështetur në ligjin për AMF-në, kriteret kryesore të shpallura nga Kuvendi për kandidtatët janë: të jenë shtetas shqiptar; të kenë përfunduar ciklin e plotë të studimeve universitare në ekonomi, juridik ose të lidhur me shkencën e aktuarëve; të kenë përvojë profesionale të paktën 7- vjeçare, nga e cila, të paktën, pesë vjet në financë-kontabilitet, administrim i shoqërive tregtare, këshillim ligjor i shoqërive tregtare, hartim legjislacioni, shkencë e aktuarëve, sigurime shoqërore dhe pensione, etj.
Sipas ligjit “Për Autoritetin e Mbikëqyrjes Financiare”, Kryetari i Bordit emërohet nga Kuvendi, me propozimin e Komisionit Parlamentar për Ekonominë dhe Financat, pas një procedure përzgjedhëse. Mandati i çdo anëtari të Bordit, duke përfshirë kryetarin është 5 vjet dhe mund të rizgjidhen për një mandat të dytë pas përfundimit të mandatit të tyre.
Kryetari i Bordit të AMF-së është anëtar joekzekutiv dhe jo me kohë të plotë.
Sipas ligjit, Kryetari i Bordit ka kompetencë të thërrasë dhe drejtojë mbledhjet e Bordit, të paraqesë rendin e ditës, të urdhërojë ngritjen e komiteteve të kontrollit, objektin e punës, si dhe afatet për shqyrtimin e çështjes, t’i propozojë Bordit ngritjen e komiteteve këshillimore, me qëllim hartimin e politikave për mbarëvajtjen e punës së Autoritetit, si edhe kompetenca të tjera, të akorduara me vendimmarrje të vetë Bordit./MONITOR
