Të gjithë drejtorët paraardhës të Ami Kozelit në Autoritetin Rrugor Shqiptar janë në burg, në arrest shtëpiak,...
AKTUALITET
Hakmarrje ndaj diasporës? Pas protestës, dhjetëra qytetarë përballen me gjoba 110 mijë lekëshe
Piranjat NewsPërditësimi i fundit 21 Qershor 2026, 16:18
Një denoncim i mbërritur tek Piranjat News ngre shqetësime për mënyrën se si janë trajtuar disa pjesëtarë të diasporës që morën pjesë në protestën e zhvilluar një ditë më parë në Tiranë. Sipas tyre, gjatë kthimit drejt veriut të vendit, ata janë ndëshkuar me gjoba prej 110 mijë lekësh secili nga Policia e Shtetit.
Sipas denoncuesve, masat administrative janë vendosur me argumentin se automjetet kanë penguar qarkullimin rrugor dhe kanë lëvizur me shpejtësi të reduktuar përgjatë itinerarit të kthimit nga kryeqyteti.
Qytetarët raportojnë gjithashtu se sot janë përballur me vështirësi në kalimin e kufirit drejt Malit të Zi. Sipas tyre, në pikën kufitare të Muriqanit u është komunikuar se duhet të shlyejnë më parë gjobat e vendosura, ndërsa theksojnë se, duke qenë ditë e diel, e kanë të pamundur të kryejnë pagesat menjëherë.
Protestuesit kanë dërguar edhe dokumente që, sipas tyre, vërtetojnë vendosjen e gjobave për shkelje që lidhen me pengimin e qarkullimit rrugor. Ata pretendojnë se masat janë marrë ndaj automjeteve të diasporës që morën pjesë në protestën e organizuar në Tiranë.
Deri në këtë moment nuk ka një reagim zyrtar nga institucionet përgjegjëse lidhur me pretendimet për gjobat e vendosura dhe vështirësitë e raportuara në kalimin kufitar./ Piranjat News
