Profesori i njohur amerikan i ekonomisë, Steve Hanke, ka reaguar lidhur me revoltën studentore në Shqipëri, duke bërë thirrje t&...
AKTUALITET
Sulmi me molotov ndaj Komisariatit Nr. 3, Skender Hita: 10 policë të plagosur
PiranjatPërditësimi i fundit 18 Tetor 2026, 20:39
Drejtori i Përgjithshëm i Policisë së Shtetit, Skender Hita, ka dënuar ashpër sulmin ndaj Komisariatit të Policisë Nr. 3 në Tiranë, ku sipas tij, 10 punonjës policie mbetën të plagosur pas përdorimit të bombave molotov, lëndëve piroteknike, gurëve dhe sendeve të forta.
Ai theksoi se 10 punonjësit e plagosur nuk kishin qenë të angazhuar në veprimet policore gjatë ditëve të mëparshme të protestave, por po kryenin detyrën për ruajtjen dhe sigurinë e komisariatit. Sipas kreut të Policisë së Shtetit, nga sulmi u rrezikua jo vetëm jeta e efektivëve, por edhe siguria e personave të shoqëruar që ndodheshin brenda ambienteve të komisariatit.
“Dua të jem shumë i qartë për të gjithë se sulmi ndaj një komisariati policie nuk është protestë. Goditja e punonjësve të Policisë me bomba molotov dhe mjete të tjera të rrezikshme është dhunë e rëndë, e cila dënohet nga ligji dhe nuk mund të justifikohet në asnjë rrethanë”, deklaroi Hita.
Drejtori i Policisë bëri të ditur se edhe gjatë ditës janë regjistruar sulme të tjera ndaj efektivëve, ku janë përdorur gurë, lëndë piroteknike, sfera metalike dhe bomba molotov, duke shkaktuar plagosjen e disa punonjësve të tjerë. Ai tha se prej gjashtë ditësh strukturat e Policisë së Shtetit po përballen me akte të përsëritura dhune gjatë ushtrimit të detyrës për garantimin e rendit dhe sigurisë publike.
Hita paralajmëroi se policia po punon për identifikimin e personave të përfshirë në këto ngjarje, dokumentimin e veprimeve të tyre dhe referimin e provave pranë organeve të drejtësisë.
“Çdo person për të cilin provohet përgjegjësia penale do të përballet me pasojat që parashikon ligji”, u shpreh ai.
Kreu i Policisë së Shtetit nënvizoi se e drejta për të protestuar në mënyrë paqësore është e garantuar me Kushtetutë dhe se policia ka detyrimin ta mbrojë atë. Megjithatë, ai theksoi se kjo e drejtë nuk mund të përdoret për të justifikuar sulmet ndaj efektivëve apo dëmtimin e pronës publike dhe private.
Hita bëri të ditur se ka udhëzuar të gjitha strukturat policore të vijojnë detyrën me profesionalizëm, vetëpërmbajtje dhe vendosmëri, duke respektuar ligjin, procedurat standarde dhe parimin e proporcionalitetit. Një apel të veçantë ai u drejtoi qytetarëve që marrin pjesë në protesta paqësore, duke u kërkuar të distancohen nga personat që përdorin dhunën.
“Policia e Shtetit nuk është kundërshtare e qytetarëve. Ajo është në shërbim të tyre. Nuk duhet dhe nuk mund të krijohet një klimë armiqësie ndërmjet qytetarëve dhe punonjësve të Policisë”, deklaroi Hita.
