Një analizë e thellë e zhvillimeve të fundit politike zbulon një prapaskenë të errët që përfshin nivelet m&e...
AKTUALITET
I shkoi me armë pasi i dhunuan nipin, xhaxhai i kamarierit: Më thanë do ta fusim në dhè
PiranjatPërditësimi i fundit 1 Shtator 2026, 21:01
Xhaxhai i Genti Nelës, kamarierit që dyshohet se u dhunua barbarisht nga pronarët e hotelit ku punonte, pasi nuk kishte marrë pagesën, ka dhënë dëshminë e tij për ngjarjen e rëndë të ndodhur në Malin e Robit, në Kavajë.
Melison Nela ka deklaruar se më 27 gusht 2026, rreth orës 23:00, ishte duke u kthyer në banesën e tij, në kompleksin “Kaltërsia”, kur pranë lokalit ku punonte nipi i tij, Genti Nela, ka parë disa persona të gjakosur.
Për shkak të shqetësimit se mos i kishte ndodhur diçka nipit, ai ka ndaluar automjetin dhe ka pyetur kamarierin Beni Duda se çfarë kishte ndodhur. Sipas dëshmisë së Melison Nelës, Duda i ka thënë se Gentin e kishin goditur djemtë e Fatmir Habilit. Më pas, Melison Nela është afruar dhe ka parë Fatmir Habilin. Pasi i është prezantuar si xhaxhai i Gentit, e ka pyetur se çfarë kishte ndodhur.
Sipas deklarimit të tij, përgjigjja ka qenë kërcënuese. Fatmir Habili i ka thënë se “do t’i fuste në dhe” dhe se do ta vriste. Melison Nela ka deklaruar se i ka kërkuar ndjesë dhe i ka thënë se do të largohej. Por, teksa po largohej, një grua bionde, e cila mbante syze optike, e ka ndjekur nga pas dhe, sipas tij, i ka thënë se nipin e tij do ta fusnin në dhe.
Xhaxhai i Gentit ka deklaruar se i është përgjigjur se nuk kishte mundësi që t’ia bënin këtë nipit, pasi ai do të ishte përpara tij, dhe më pas është larguar.
Në dëshminë e tij, Melison Nela ka treguar gjithashtu se gjatë bisedës me Fatmir Habilin kanë ndërhyrë edhe disa të rinj të tjerë, të cilët, sipas tij, e kanë kërcënuar duke i thënë se do ta vrisnin.
Ai ka sqaruar se në momentin kur ka mbërritur në vendngjarje, nuk e ka takuar nipin e tij, Genti Nela, pasi ai nuk ndodhej aty. Më pas ka komunikuar me vëllain e tij, i cili i ka treguar se Genti ishte goditur, por nuk kishte dijeni për rrethana të tjera të ngjarjes.
Për dhunën ndaj Genti Nelës janë arrestuar pronarët e hotelit, Florian Habilaj dhe Enold Dragoti, ndërsa persona të tjerë janë shpallur në kërkim nga policia.
