Sekretari amerikan i Shtetit, Marco Rubio, ka kritikuar ashpër Meksikën për atë që e cilësoi si masa të pamjaftueshme kund&...
AKTUALITET
Meta mbërrin në Çepan për ceremoninë mortore të babait
PiranjatPërditësimi i fundit 2 Qershor 2026, 11:50
Këto janë momentet kur furgoni i Drejtorisë së Burgjeve, ku brenda tij ndodhej ish-presidenti Ilir Meta, mbërrin në Çepan të Skraparit ku do të jetë i pranishëm në ceremoninë mortore të babait të tij të ndjerë, Rexhep Meta.
Ish-presidenti ka përfituar leje nga Struktura e Posaçme kundër Korrupsionit dhe Krimit të Organizuar (SPAK) ndërsa pas gati dy vitesh në paraburgim, kjo është hera e parë që ish-presidenti Ilir Meta del jashtë qelive përveç rasteve kur ai është paraqitur në seancat gjyqësore.
Meta është shoqëruar nga forcat e Drejtorisë së Burgjeve ndërsa sipas lejes së dhënë, ai pritet të marrë pjesë si në ceremoninë mortore, ashtu edhe në pritjen e ngushëllimeve që familja do të organizojë.
Pas përfundimit të ceremonive, ish-presidenti do të rikthehet në ambientet e paraburgimit, në përputhje me kushtet e lejes së miratuar nga autoritetet.
Babai i tij, Rexhep Meta, ndërroi jetë të hënën në moshën 83-vjeçare.
Ceremonia e varrimit është planifikuar të zhvillohet në orën 12:00 ndërsa leja e dhënë për Metën parashikon që ai të mund të qëndrojë edhe në drekën që do të shtrohet pas ceremonisë mortore.
Sipas burimeve, ish-presidenti pritet të kthehet në paraburgim në orët e pasdites, ndërsa është parashikuar që ai të dalë sërish të nesërmen në mëngjes, nga ora 09:00 deri në 21:00, me miratim të Prokurorisë së Posaçme (SPAK), për të marrë pjesë edhe në pritjet e ngushëllimeve që familja do të organizojë në Tiranë.
