Drejtori i Përgjithshëm i Policisë së Shtetit, Skënder Hita ka mbërritur në Drejtorinë e Policisë së Kor&cce...
AKTUALITET
Ndërtuan 9 kate në paqe, u kujtuan në tarracë! IKMT shemb pallatin me 200 apartamente – pse nuk u përdor për strehim social? Po ata që blenë që në themele, kush mban përgjegjësi?
PiranjatPërditësimi i fundit 14 Tetor 2025, 17:41
Në Yzberisht po shemben mbi 200 apartamente të ndërtuara në një kompleks pallati. Në total rreth 4 mijë metra katrorë ndërtime pa leje që janë ngritur nga biznesmeni Sino Llanaj, aksion ky që ka nisur vetëm pak ditë parë, nga ku u vendos në pranga edhe ndërtuesi Llanaj. Pallai 9 katësh nuk mbiu brenda natës, ku ishte Inspektorati Kombëtar i Mbrojtjes së Territorit dhe Bashkia e Tiranës kur nisi ndërtimi i këtij kompleksi të madh, që filloi në fazën e themelit, në gropë?
Pse u lejuan këto ndërtime pa leje të përparonin deri në këtë masë, për të ardhur më pas deri te vendimi për shembjen?
Ky kompleks, i cili përbën një investim të konsiderueshëm, është ngritur në një zonë ku kërkesat për banesa janë të larta. Pyetja që lind është përse këto banesa nuk janë përdorur për të përmbushur nevojat sociale, veçanërisht për çiftet e reja dhe familjet në nevojë, në vend që të shemben duke krijuar edhe kosto shtesë për familjet që kanë blerë aty.
Tani lind shqetësimi më i madh, çfarë do të ndodhë me familjet që kanë blerë apartamente në këtë kompleks? A do të kompensohen? A do të kenë alternativë? Në rast se ndërtesat shemben, këto familje mbeten pa banesë dhe me humbje të mëdha financiare.
Në këtë situatë, përgjegjësit e IKMT-së dhe Bashkisë duhet të japin llogari për vonesat dhe mungesën e veprimeve në kohën e duhur, duke shmangur kështu dëmin e madh që po i shkaktohet banorëve dhe qytetit.
Mos duhet që institucionet përkatëse të garantojnë kompensim të drejtë dhe zgjidhje të qëndrueshme për familjet e prekura, pse shteti hesht përballë fakteve të tilla që janë e zeza mbi të bardhë!
Kjo papërgjegjshmëri institucionale është një dëshmi e qartë e sistemit të korruptuar, që godet direkt qytetarët, duke minuar edhe besimin ndaj shtetit, siç po ndodh prej vitesh në fakt. Për këtë arsye, duhet kërkuar llogari jo vetëm për ndërtuesin, por edhe për të gjithë ata zyrtarë që kanë qëndruar indiferentë apo kanë mbyllur sytë ndaj këtij abuzimi, që sot ka marrë përmasa të tilla, ku një kompleks gjigand do shembet, duke u bërë thjeshtë pluhur.
Emri i Sino Llanajt nuk është i panjohur:
Dy pronarët Sino Llanaj dhe Albert Allmuça kishin rënë dakord për ndërtimin e objektit te ish-Parku i autobusëve brenda vitit 2019, por kontrata mes tyre ishte prishur dhe objekti s’ishte ndërtuar, duke sjellë probleme jo vetëm mes dy biznesmenëve, por edhe me banorët, që vijonin të jetonin me qira.
Më 13 Janar 2021, dy pronarët u përfshinë në një sherr fizik dhe verbal, ku nga përdorimi i armës mbeti i plagosur biznesmeni Sino Llanaj, si dhe një kalimtar i rastit, shtetasi Klodian Komino, të cilin një plumb rikoshetë e ka kapur në kofshë.
Gjithashtu, gjatë sherrit, mbeti i plagosur me sende të forta edhe roja i objektit, Shkëlzen Biberi./piranjat.al
