Kongresmeni amerikan Jim McGovern ka reaguar me shqetësim për protestat në Shqipëri, duke i bërë thirrje qeverisë të nda...
AKTUALITET
Përpiqet të arratiset nga dritarja, policia i sharron derën dhe e arreston. I riu shqiptar dënohet në Britani: Pagova 18 mijë paund!
PiranjatPërditësimi i fundit 20 Shkurt 2026, 22:09
Një burrë shqiptar i cili pagoi 18,000 paund për të udhëtuar drejt Mbretërisë së Bashkuar për të kërkuar punë, u zbulua duke u kujdesur për një fermë të madhe kanabisi.
Policia që bastisi fermën e drogës, e cila ishte e shtrirë në tre kate të një magazine, zbuloi 354 bimë kanabisi me një prodhim të mundshëm prej pothuajse 20 kilogramësh dhe me një vlerë nga 68,250 deri në 194,700 paund. Pasi fillimisht tentoi të thyente xhamin e një dritareje në tavan për t’u arratisur, 27-vjeçari Gezim Falli u arrestua kur policia preu drynat për të hapur dyert e godinës.
Prokurorja Victoria Barker i tregoi Gjykatës në Bradford se një qiramarrës i ri kishte marrë me qira ndërtesat në tetor të vitit të kaluar. Megjithatë, një menaxher i pronarëve të godinës nisi dyshimet kur nuk pati më asnjë komunikim dhe askush nuk dukej se ishte zhvendosur aty.
Kur ai vizitoi ambientin, zbuloi se ishte mbyllur me dry nga jashtë, por edhe i kyçur nga brenda. Një dritare në katin e parë ishte e hapur, ndërsa në një tjetër ishte grumbulluar kondensim.
Oficerët e policisë shkuan në godinë në orët e para të 28 janarit të këtij viti dhe thanë se brenda kishte një burim nxehtësie, që ata dyshuan se ishte pjesë e një ferme kanabisi. Teksa nisën të hynin me forcë, dëgjuan zhurmën e thyerjes së xhamit dhe panë shqiptarin duke u përpjekur të thyente daljen nga ambienti. Oficerët bërtitën se godina ishte e rrethuar nga policia dhe nisën të prisnin derën me sharrë.
I riu shqiptar, i cili kishte dëmtime në duar nga tentativa për t’u arratisur përmes dritares në tavan, më pas u shfaq dhe hapi derën, duke u arrestuar. Ai ishte i vetmi person në godinë, e cila ishte shndërruar në “një fermë kanabisi të sofistikuar në shkallë të gjerë”.
Bimët po kultivoheshin në tre dhoma në tre kate të ndryshme. Të gjitha pajisjet e nevojshme për kultivimin ishin të pranishme, me një kosto të vlerësuar prej 10,000 paundësh, dhe kishte edhe ambiente kuzhine dhe fjetjeje.
Kur u mor në pyetje, ai tha se kishte shkuar në Mbretërinë e Bashkuar ilegalisht pesë muaj më parë, në pjesën e pasme të një kamioni. Zonja Barker tha: “Ai pagoi 18,000 paund për atë udhëtim dhe erdhi në kërkim të punës, por nuk arriti të gjente punë.
“Ai pranoi se punonte në magazinë duke u kujdesur për bimët e kanabisit. Ai tha se e bënte punën me dëshirë dhe jo nën kërcënim apo detyrim.” Gëzimi u deklarua fajtor për prodhim kanabisi dhe dëmtim kriminal. Avokati tha se i riu dëshironte të kthehej në Shqipëri sa më parë të ishte e mundur.
Duke e dënuar atë me 28 muaj burg, i riu shqiptar u paraqit përmes videot nga burgu, ndërsa hetuesi tha se ai kishte refuzuar të tregonte se si kishte përfunduar në atë magazinë. /PiranjatNews/
