Komisioni Evropian do të propozojë krijimin e një mekanizmi të ri emergjent për të përballuar flukset e papritura dhe masiv...
AKTUALITET
Policia arreston ‘skifterët’ shqiptarë duke fjetur në makinë, gabimi që bënë i lidhi me policinë. I riu: Dua të bëj lekë për t’u kthyer!
PiranjatPërditësimi i fundit 8 Prill 2026, 20:25
Policia belge arrestoi tre hajdutë shqiptarë pasi njëri prej tyre kishte harruar lokalizuesin e ndezur. Prokuroria i akuzon për pesë vjedhje, por thotë se kjo mund të jetë vetëm maja e ajsbergut. 25-vjeçari që kishte lënë lokalizuesin ndezur tha se u detyrua të vidhte pasi duhej të financonte rikthimin e tij në Shqipëri. Bashkë me të në pranga ra edhe vëllai i tij 26-vjeçar dhe një 50-vjeçar
Policia arrestoi treshen ndërsa po flinin në sediljen e pasme të makinës së tyre në Dilbeek. Automjeti ishte shpallur në kërkim pasi ishte vënë re pranë banesave ku ishin kryer vjedhjet në Puurs-Sint-Amands, Temse dhe Dilbeek. Në një nga rastet, një fqinj kishte arritur të bënte edhe një foto të makinës. Pas arrestimit, të tre u morën në pyetje dhe u dërguan në burg.
Në makinë, policia gjeti jo vetëm mjete për vjedhje, por edhe sende të vjedhura. Sipas prokurorisë, bëhej fjalë për monedha ari, bizhuteri, parfume, një xhaketë dhe çanta dore. Një pjesë e sendeve lidhet me pesë vjedhje banesash, mes tyre në Broekstraat (2 herë) dhe në Meir në Puurs-Sint-Amands. Sendet kishin shpesh vlerë emocionale për viktimat.
“Por një pjesë e sendeve të gjetura nuk mund të lidhej me viktimat e njohura. Kjo lë të dyshohet se tre personat mund të jenë të përfshirë në më shumë raste,” tha prokuroria. Për ta, faktet janë të provuara qartë. Prokuroria u mbështet veçanërisht te vendndodhja e telefonit celular të njërit prej hajdutëve.
25-vjeçari shqiptar e kishte lënë lokalizuesin të ndezur, gjë që i lejoi policisë ta lidhte drejtpërdrejt me pesë vjedhjet.
Për të tre u kërkua një dënim me 18 muaj burg efektiv. Ata nuk i mohuan faktet dhe deklaruan se kishin lënë vendin e tyre për të punuar në Mbretërinë e Bashkuar dhe për të fituar më shumë para.
“Por ata u mashtruan nga personi që do t’i çonte atje, ndaj përfunduan në Belgjikë dhe u mbetën pa ushqim dhe pa para,” tha avokati Dirk Jacobs.
Edhe avokatja Farah Jessous shtoi: “Për shkak të kësaj situate të vështirë, vendosën të vjedhin”.
Të dy burrat kanë kërkuar falje.
Avokatja e 25-vjeçarit, Evelien Jacobs, tha se klienti i saj nuk është “mjeshtër hajdut”.
“Kjo duket edhe nga fakti që ai nuk mendoi për lokalizuesin e telefonit,” tha ajo. “Ai i kreu këto vepra nga marrëzia dhe dëshpërimi. Kërkon falje”.
Të tre avokatët kërkuan që gjykata të japë një dënim me kusht. /HLN
