Një shpërthim me lëndë të dyshuar plasëse është regjistruar në orët e para të mëngjesit të so...
AKTUALITET
"Prania e tyre e panevojshme," The Guardian: Kampet e emigrantëve bosh prej javësh, policia italiane dhe punonjësit socialë largohen nga Shqipëria!
n.fPërditësimi i fundit 24 Nëntor 2024, 19:33
Foto ilustruese
GJADËR- Kampet e emigrantëve në Gjadër dhe Shëngjin vijojnë të "tërheqin" vëmendjen e media ndërkombëtare. Së fundmi "The Guardian" ka publikuar një tjetër artikull në lidhje me kampin e emigrantëve ndërsa shkruan se dhjetra oficerë policie dhe punonjës socialë italianë të vendosur nga qeveria e ekstremit të djathtë të Italisë në qendrat e emigrantëve në Shqipëri janë kthyer në shtëpi. Më tej në artikull theksohet se ata janë kthyer në shtëpi pasi u zbulua se objektet, të vlerësuara si model për reduktimin e ardhjeve të refugjatëve, kanë qenë bosh prej javësh.
Sipas "The Guardian" pak më shumë se një muaj pas hapjes së shumë-publikuar të qendrave të paraburgimit miliona euro për azilkërkuesit në Shqipëri, të cilat supozohej të merrnin deri në 3000 burra në muaj, më shumë se 50 oficerë policie u kthyen në Itali dy javë më parë, ndërsa dhjetëra e punonjësve socialë janë larguar gjatë fundjavës, me praninë e tyre në Shqipëri të cilësuar si “të panevojshme”.
Artikulli i prestigjiozet britanike vijon ndërsa shkruan se që nga hapja e tyre më 11 tetor, vetëm 24 azilkërkues janë dërguar në qendrat në Shqipëri, me qëllim riatdhesimin e tyre në vendet e origjinës. Pesë kaluan më pak se 12 orë në një qendër paraburgimi, ndërsa pjesa tjetër qëndruan për pak më shumë se 48 orë.
Të gjithë u transferuan në Itali pasi gjyqtarët italianë e konsideruan të paligjshme ndalimin e tyre në Shqipëri përpara riatdhesimit në vende, si Bangladeshi dhe Egjipti, të konsideruara si "të sigurta" nga Roma. Duke vepruar kështu, gjyqtarët po mbështesnin një vendim të 4 tetorit nga gjykata e drejtësisë e BE-së (ECJ) se një vend jashtë bllokut nuk mund të shpallej i sigurt nëse i gjithë territori i tij nuk konsiderohej i sigurt.
Si rezultat, qendrat, të prezantuara nga presidentja e Komisionit Evropian, Ursula von der Leyen, si një model i ri për krijimin e qendrave të përpunimit dhe ndalimit për azilkërkuesit jashtë BE-së, janë bosh prej më shumë se një muaji. Në një kohë kur qeveria po përpiqet të balancojë buxhetin – duke shkurtuar fondet për arsimin, shëndetësinë dhe sigurimet shoqërore – partitë opozitare e kanë përshkruar marrëveshjen, që do të kushtojë rreth 1 miliardë euro (830 milion £) gjatë pesë viteve, si një “katastrofë financiare”.
“Misioni u krye!” tha Riccardo Magi, presidenti i partisë së majtë opozitare Più Europa.
“Qeveria ka pasur sukses në përpjekjet për riatdhesim. Emigrantët? Jo, operatorë italianë të dërguar në Shqipëri, të cilët do të kthehen në shtëpi brenda fundjavës. Qeveria fillimisht shpenzoi një shumë të madhe fondesh publike, më pas me qendrat e zbrazura, solli disa punonjës policie në Itali dhe tani edhe punonjësit socialë po kthehen në shtëpi. Ky është një dështim epokal,” tha ai.
Skema ka çuar në një grindje mes qeverisë dhe gjyqtarëve, të cilët janë akuzuar nga partitë e ekstremit të djathtë për pengim të projektit. Nicola Gratteri, kryeprokurori i Napolit dhe një nga gjyqtarët më autoritativë në Itali, tha në një intervistë televizive këtë javë: “Ne duhet të ndalojmë së sulmuari gjyqtarët vetëm sepse nuk na pëlqen një vendim.
Qeveria ka thënë se qendrat në Shqipëri “do të mbeten të hapura dhe funksionale” dhe se transferimet në Itali janë bërë sipas nevojave të personelit. Megjithatë, besueshmëria e kryeministres së Italisë, Giorgia Meloni, është në rrezik pasi ajo e bëri emigracionin një çështje qendrore të fushatës. Në të kaluarën ajo ka kritikuar paraardhësit për shpenzimin e parave publike për menaxhimin e krizës së migracionit. Transporti nga deti në një anije ushtarake italiane me vetëm tetë burra që mbërritën në Shqipëri gjatë një fundjave në mes të nëntorit kushtoi 250,000 € (205,000 £) - më shumë se 31,000 € për azilkërkues në bord, përfundon "The Guardian".
