Prezenca e OSBE-së në Shqipëri ka reaguar pas protestave të dhunshme dhe tensioneve që kanë përfshirë Tiranën gjat&...
AKTUALITET
Protestuesit zhvendosen te Shallvaret, digjet një kioskë në krah të “Tajvanit”, dëgjohen shpërthime
PiranjatPërditësimi i fundit 15 Tetor 2026, 20:27
Protestuesit kanë ndryshuar sërish drejtimin e marshimit në Tiranë, duke u zhvendosur drejt zonës së Shallvareve, ku është regjistruar një tjetër incident me zjarr gjatë ditës së tretë të demonstratave.
Një kioskë që ndodhet në krah të kompleksit “Tajvani” është përfshirë nga flakët, ndërsa tymi është përhapur në zonën përreth.
Incidenti ka ndodhur në një kohë kur grupe protestuesish vijojnë të lëvizin në pjesë të ndryshme të Tiranës, pas përplasjeve të përsëritura me forcat e rendit.
Djegia e kioskës pranë “Tajvanit” i shtohet një serie incidentesh me zjarr të regjistruara gjatë protestës së sotme. Më herët, një kioskë u përfshi nga flakët në Parkun Rinia, ndërsa një tjetër u dogj pranë Kryeministrisë.
Incidente të ngjashme janë regjistruar edhe në Rrugën e Elbasanit, ndërsa në zonën e Zogut të Zi janë djegur kosha mbeturinash dhe struktura reklamash.
Gjatë orëve të fundit, përplasjet mes demonstruesve dhe policisë janë përqendruar në disa pika. Në bulevardin “Dëshmorët e Kombit”, protestuesit kanë hedhur gurë drejt efektivëve, ndërsa forcat e rendit janë përgjigjur me gaz lotsjellës dhe ujë me presion.
Tensione janë raportuar edhe pranë Ministrisë së Brendshme, ku policia ka ndërhyrë me gaz lotsjellës pas hedhjes së gurëve nga grupe protestuesish.
Ndërkohë, demonstruesit kanë vijuar marshimin në Rrugën e Kavajës, bulevardin “Zogu I” dhe në zona të tjera, duke kërkuar dorëheqjen e kryeministrit Edi Rama.
Gjatë ndërhyrjeve të policisë janë raportuar shoqërime të shumta, ndërsa autoritetet nuk kanë publikuar ende një bilanc përfundimtar për numrin e personave të shoqëruar dhe dëmet materiale.
Për sa i përket incidentit te Shallvaret, ende nuk ka informacion të konfirmuar për persona të lënduar apo përmasat e dëmeve të shkaktuara nga zjarri në kioskën pranë “Tajvanit”.
Protestuesit kanë paralajmëruar vijimin e tubimeve edhe nesër, ndërsa dita e tretë e demonstratave po mbyllet me tensione të vazhdueshme dhe incidente në disa zona të Tiranës.
