Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
AKTUALITET
Qirinj e lule për 14-vjeçarin, nxënës e prindër të tronditur/ Shokët e Martinit: Djalë i vetëm, në momentet e fundit kërkonte mamanë!
E.DPërditësimi i fundit 19 Nëntor 2024, 17:00
TIRANË- Vrasja e 14-vjeçarit, Martin Cani ka tronditur mbarë opinionin publik. Që në orët e para të mëngjesit nxënës dhe prindër kanë vendosur lule dhe qirinj në vendin ku i mituri u qëllua me thikë nga bashkëmoshatari i tij. Gjithashtu shokët e tij shprehen se janë shumë të prekur dhe thonë se kjo gjë nuk duhet të ndodhte kurrë.
“Shumë e rëndë, nuk më duket normale me thika. Zihu bëj ç’të duash por jo t’i marrësh jetën. Kalama i vetëm, se familja e vetë… më vjen shumë keq, një çun që kishte e çoi në shkollë ai… në momentet e fundit, ai o mam o mam!”, shprehet një nga shokët e shkollës së Martinit.
Ndërsa një tjetër thotë: “Jam shumë i prekur. Thjesht di që s’duhet të ndodhte!”.
Ngjarja vijon të trondisë shoqërinë shqiptare, e po ngre pikëpyetje të mëdha për sigurinë e nxënësve brenda dhe jashtë shkollës. Po ashtu gjyshja e shokut të Martinit thotë se prindi duhet ta mësojë fëmijën ta dojë shokun.
“E pret nëna në shtëpi, e priste për drekë. Ku i vajti ai fëmijë? Ku i vajti? Ku është përgjegjësia e mësuesve, e rojeve te dera, e shokëve. Prindi duhet ta mësojë ta dojë shokun. Unë kam nipin ishte paralel, nuk kam guxim ta pyes. Nipi im që mbrëmë ka ngrirë nuk flet….”, shprehet gjyshja e shokut të Martinit.
Konflikti mes bashkëmoshatarëve të Fan Nolit që dyshohet se ka nisur që të premten brenda shkollës ka ndezur revoltën e komunitetit për neglizhencën institucionale të treguar. Oficerja e sigurisë e shkollës mohon përgjegjësitë duke thënë se brenda shkollës nuk ka ndodhur asnjë konfikt.
“Nuk ka ndodhur asnjë konflikt brenda shkollës, kaq dua të them!”, shprehet ajo.
Një prej prindërve thotë se “Unë nuk kam dijeni për oficer sigurie përveç portierit qe hap derën, se po të ishte do ishin zbuluar grupet që grinden me njëri tjetrin e do ishte parandaluar”.
