Përpara bllokut të sigurisë pranë Komisariatit nr. 3 në Tiranë, një burrë 54-vjeçar përpiqet të mbaj&...
AKTUALITET
Rama e përmendi live/ ILD doli nga rreshti, Ministria shtyn përpara çështjen e prokurores Gjeli
PiranjatPërditësimi i fundit 28 Shtator 2025, 20:04
Ministria e Drejtësisë nuk është pajtuar me vendimin e Inspektorit të Lartë të Drejtësisë (ILD) për të arkivuar ankesën ndaj prokurores së Prokurorisë së Shkodrës Elsa Gjeli. Ministria e Drejtësisë sqaron se ka paraqitur ankim në Këshillin e Lartë të Prokurorisë, në datën 24 shtator.
Inspektori i Lartë i Drejtësisë, Artur Metani, nuk nisi hetim disiplinor ndaj prokurores së Shkodrës, Elsa Gjeli, duke e nxjerrë të pastër dhe korrekte nga ana proceduriale. Metani mbajti qëndrim ligjor dhe i drejtë, pavarësisht se u urdhërua publikisht nga kryeministri Edi Rama.
Në një shkresë dërguar Ministrisë së Drejtësisë më 17 shtator 2025, ILD njoftoi se e kishte arkivuar kërkesën për hetim disiplinor, pasi pas verifikimeve paraprake nuk u gjet asnjë element për ta justifikuar.
“Mëkati” i prokurores: Në kohën kur në zonën e Thethit policia kreu aksione ndaj bizneseve dhe strukturave akomoduese, ajo depozitoi kallëzim për një prej ndërtimeve prej druri në atë zonë. Pas shqyrtimit të dokumentacionit, prokurorja Elsa Gjeli nuk gjeti elementë të veprës penale dhe refuzoi të niste hetim për ndërtim pa leje.
Më 7 korrik, Rama doli publikisht dhe e akuzoi se kishte refuzuar regjistrimin e procedimit penal. Prokurorja reagoi duke i quajtur deklaratat e kryeministrit të paprecedenta, diskriminuese dhe ndërhyrje të drejtpërdrejtë në punën e saj, që e vendosnin në shënjestër profesionale. Ajo kërkoi nga Këshilli i Lartë i Prokurorisë të analizonte sjelljen e Ramës, duke i kujtuar edhe deklaratën e ambasadorit të BE-së se të gjithë duhet të ndalojnë presionin ndaj drejtësisë.
Pas kësaj përplasjeje, Metani doli kundër qëndrimit të Ramës, duke faktuar përmes dokumenteve se nuk ekzistonin elementë juridikë apo faktikë për të nisur hetim ndaj prokurores.
Edhe pse ILD nuk pa problem ministria e drejtesisë nuk mjaftohet kërkon me patjetër të çojë deri në fund fjalën e Ramës.
Por kush është Elsa Gjeli, prokurorja që u sulmua nga Rama?
Prokurorja e Shkodrës, Elsa Gjeli një vit më parë ka përfunduar Shkollën e Magjistraturës dhe është emëruar si magjistrate e re në kryeqendrën e veriut. Pas tre vitesh si studente në Magjistraturë, nga 2021 deri ne 2024, Elsa Gjeli u emërua Prokurore në Prokurorinë e Shkodrës më datë 25 Korrik 2024.
Ajo e ka kaluar një vit tashmë në detyrën e rëndësishme, ku përfaqëson akuzën zyrtare të shtetit në gjykatë. Gjeli ka marrë zyrtarisht detyrën nga Qeveria e Prokurorëve apo ndryshe Këshilli i Lartë i Prokurorisë, më 25 korrik 2024, me firmë të kryetares Mirela Bogdani dhe tetë anëtarëve. Vlen të theksohet se në sistem, ndaj saj nuk rezulton të ketë ndonjë masë disiplinore apo vërejtje, duke pasqyruar një CV të pastër. Megjithatë, Rama është mësuar që të gjithë të bëjnë çfarë ai thotë dhe ndaj e sulmoi Elsa Gjelin, me prokuroren që bëri detyrën e saj dhe kundërshtoi të jetë në “shërbim” të kryeministrit.
Ky është një rast i parë domethënës i mbrojtjes së pavarësisë së drejtësisë përballë presioneve të hapura nga qeveria./Piranjat
