Në Shqipëri numri i fëmijëve po bie ndjeshëm, ndërsa investimet në arsim dhe mbrojtje sociale mbeten dukshëm më t...
AKTUALITET
Rama mes përpëlitjesh ndaj SPAK/ Tomorri: Deklaratat e tij, strategji për të fituar kohë përballë presionit të BE
PiranjatPërditësimi i fundit 26 Shkurt 2026, 18:39
Qëndrimet e mbajtura sot nga kryeministri Edi Rama në mbrojtje të zyrtarëve të lartë të qeverisë së tij përballë akuzave të SPAK, po komentohen si një përpëlitje për të blerë kohë përpara një përballjeje të pashmangshme me drejtësinë.
Gazetari Klodian Tomorri, në studion e ‘Task Forcë’ në SYRI TV me Sonila Meçon, u shpreh se strategjia e kryeministrit duket se është fokusuar në zvarritjen e proceseve, një lojë politike ku herë lëshohen nisma kundër institucioneve të drejtësisë e herë bëhen tërheqje taktike. Kjo qasje shihet si një përpjekje për të fituar kohë, por që mbart kosto të rënda politike, veçanërisht në raport me partnerët ndërkombëtarë.
Faktori ndërkombëtar luan një rol kyç në këtë ngërç tha Tomorri dhe se kryeministri Rama e ka të qartë se çdo lëvizje për të bërë bllok politik ndaj drejtësisë apo për të vendosur kufij ndaj veprimtarisë së saj, nuk do të kalojë lehtë në Bruksel dhe do të ketë pasoja.
Klodian Tomorri: Shiko, në fakt, ajo që po bën kryeministri mua më duket si një përpëlitje, për të shtyrë akoma më shumë atë që është e pashmangshme për atë. Pra, në një moment të caktuar ai duhet të marri një vendim. Do t'i dalë frontalisht SPAK-ut dhe drejtësisë dhe do të krijojë bunkerin e paprekshmërisë për për veten dhe ministrat e vet, apo do të lërë drejtësinë të bëjë punën e saj. Deri më tani nga shpërthimi i çështjes së Ballukut, pra dosjes së Ballukut dhe asaj të Akshi-t, ajo që ka bërë kryeministri është që ka fituar kohë, është përpëlitur duke fituar kohë. Pra, duket si një lojë që herë nis ndonjë nismë kundër institucioneve të drejtësisë, pastaj më vonë korrekton ato që ka nisur. Pra, unë e shoh që zoti Rama po kërkon të fitojë ende kohë.
Ai e ka shumë të qartë, pavarësisht situatës ku është Bashkimi Europian, pavarësisht rrymave të ndryshme që mund të ketë brenda Bashkimit Europian, pavarësisht lobimeve dhe miqësive personale që mund të ketë zoti Rama brenda strukturave të Bashkimit Europian, ai e ka shumë të qartë që bërja bllok, politikisht ndaj drejtësisë, pra, vendosja e kufijve për drejtësinë, nuk mund të kalojë kollaj në Bruksel dhe nuk mund të kalojë pa pasoja për zotin Rama.
SPAK-u po kërkon ta çojë në fund procesin e nisur. Por, në rastin konkret, dosja Balluku është në parlament tek imuniteti. Pra, ajo që them, ky po mundohet ta shtyjë sa më shumë, por e di, pavarësisht këtyre përpëlitjeve, që në një moment do të duhet të përballet. A ka zoti Rama kurajon të marrë përsipër që të hapë luftë frontale me drejtësinë, t'i vendosë asaj kufij? Mua m'u duk thjesht përpëlitje. Pra, përpëlitje që kërkon të fitojë akoma më shumë kohë. A e ka këtë kurajo pra për t'i vënë gardhin drejtësisë dhe pastaj të mbajë përsipër kostot politike që do t'i vijnë, që sigurisht, mesazhet që i janë dhënë në takimet me ndërkombëtarët, pra me grupin e deputetëve nga Parlamenti Europian që ishte në Shqipëri, janë që drejtësia nuk preket, ajo duhet të bëjë punën e saj. Imuniteti i zëvendëskryeministres duhet të shqyrtohet me shpejtësi në parlament dhe ky mesazh që po t'i japim këtu nuk do të jetë edhe për shumë kohë brenda kësaj zyre, thjesht dhe vetëm brenda kësaj zyre. Pra, që do të ketë qëndrime të forta publike nga Bashkimi Europian, nga Komisioni Europian e kështu me radhë.
Dhe ato lojëra apo, po themi, ato lojëra fjalësh që bën kryeministri, që këtu nuk është akoma koha e dorëheqjeve morale, sepse jemi në fazë revolucionare të drejtësisë, apo projektet për të dhënë imunitet ligjor anëtarëve të qeverisë, sigurisht që janë një çmenduri, pasi nuk kanë se si të kalojnë, po themi, traun e Europës, për një arsye shumë të thjeshtë. Kur Bashkimi Europian nuk e njeh instrumentin e imunitetit për zyrtarët e vet, për deputetët e vet. Ju e keni parë se çfarë ndodh, se si arrestohen eurodeputetë në mes të parlamentit Europian, pa asnjë kërkesë për imunitet askund. Pra, ti po kërkon të anëtarësohesh në Bashkimin Europian, po si mund të të njohë ty Europa një privilegj që nuk ia njeh vetes? Pra, kjo është ajo, paradoksi në gjithë këtë.
