Gjatë ditës së sotme janë raportuar 30 vatra zjarri në territorin e vendit, prej të cilave 7 mbeten aktive, 10 janë në...
AKTUALITET
Rrugët e juglindjes në kolaps pas reshjeve, miliona euro investime përfundojnë në baltë
PiranjatPërditësimi i fundit 21 Shkurt 2026, 15:41
Ndonëse Autoriteti Rrugor Shqiptar, pas bllokimit të qarkullimit në aksin Librazhd-Pogradec i devijoi lëvizjet në itinerarin Maliq-Lozhan-Moglicë-Gramsh edhe kjo rrugë ka shembje të konsiderueshme në të gjithë gjatësinë e saj, duke ngritur pikëpyetje të mëdha për sigurinë e udhëtarëve.
Policia e Korçës bën të ditur për gazetaren Lorena Kodra se nga rruga e Lozhanit do të lejohet vetëm qarkullimi i automjeteve të vogla dhe jo kalimi i autobusëve apo kamionëve, masë kjo e marrë për shkak se ka dëmtime të shumta në të gjithë trupin e rrugës.
Që nga përurimi, aksi Maliq-Lozhan-Moglicë-Gramsh ka pësuar rrëshqitje të konsiderueshme dherash dhe gurësh nga shpati i malit. Po ashtu rruga ka pësuar edhe çarje të asfaltit dhe rrëshqitje anësore, ku barrierat mbajtëse janë deformuar.
Qarkullimi nga juglindja drejt Elbasanit dhe Tiranës po shkon drejt kolapsit, ku veç aksit Librazhd-Pogradec, problematika të shumta ka shfaqur edhe aksi i florinjtë Qukës-Qafë Plloçë.
Shembjet në këto akse kombëtare ngrenë pikëpyetje të mëdha mbi cilësinë e punimeve, mirëmbajtjen e rrugëve nga kontraktorët, si dhe mbikëqyrjen e standardeve teknike nga institucioni përgjegjës.
Ndërtimi i aksit Maliq-Lozhan-Moglicë-Gramsh kushtoi 1.4 miliardë lekë, ndërsa aksi Qukës-Qafë Plloçë kushtoi 260 milionë euro, rrugë të cilat u shembën me shirat e parë të vjeshtës.
