Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
AKTUALITET
Sekreti i votës së zbuluar! Nga Vlora në Mat- një ditë votimi që zbuloi fytyrën e vërtetë të sistemit
PiranjatPërditësimi i fundit 9 Nëntor 2025, 18:06
Dita e zgjedhjeve lokale në pesë bashki të vendit nuk ka kaluar pa incidente. Raportime të shumta nga terreni tregojnë për shkelje të hapura të rregullave zgjedhore, ndërhyrje politike dhe pengim të punës së mediave në disa qendra votimi.
Në Vlorë, qytet që konsiderohet bastion i socialistëve, janë regjistruar raste ku komisionarë të Partisë Socialiste janë kapur duke shpërndarë informacione mbi personat që kishin kryer votimin – një veprim që përbën shkelje të rëndë të rregullave dhe cenon drejtpërdrejt sekretin dhe sigurinë e votës.
Gazetari i Euronews Albania Ardit Hoxha ka qenë pjëse e një incidenti të ndodhur pak më parë këtë të diel në Berat në një nga qendrat e votimit në Berat. Gazetari është parë të debatojë me një nga komisionerët që ka bërë tentativë për mos të lejuar gazetarin të raportojë, i cili është në përputhje të plotë me ligjin zgjedhor për qenë pranë qendrave të votimit për raportim. Pothuajse në çdo qendër votimi të qytetit, janë vërejtur situata ku të dhëna të ndjeshme për identitetin e votuesve janë bërë publike.
Ndërkohë, ministri Taulant Balla, i njohur për ndërhyrjet e tij të mëparshme në procese zgjedhore, theu heshtjen zgjedhore, duke bërë thirrje publike për votim në favor të kandidatëve të Partisë Socialiste. Një veprim që u cilësua i papranueshëm edhe nga kreu i KQZ-së, Ilirjan Celibashi, i cili theksoi se thirrjet elektorale gjatë ditës së votimit janë të ndaluara me ligj. Në disa qendra votimi janë raportuar persona të paautorizuar që kanë hyrë brenda ambienteve zgjedhore.
“Kemi komunikuar me Policinë e Shtetit për verifikimin e dokumentacionit që disponon secili nga ata individë. Me përjashtim të 2–3 rasteve, nuk rezulton të ketë pasur problematika serioze,” deklaroi Celibashi.
Ai shtoi se nuk ka pasur raportime zyrtare për prani të personave të paautorizuar në qendrat e votimit, ndërsa për rastin e Matit u sqarua se disa prej lokaleve pranë qendrave nuk ishin zyra partie, por biznese private. Megjithatë, në Bashkinë e Matit, procesi i votimit është shoqëruar me tensione dhe shkelje të transparencës, pasi gazetarët e Syri TV nuk janë lejuar të futen në qendrat e votimit për të raportuar mbi ecurinë e procesit.
Sipas ekipit të terrenit, punonjës të administratës zgjedhore dhe persona të lidhur me strukturat e pushtetit lokal kanë penguar hyrjen e mediave, duke tentuar t’u mbyllin derën përpara se gazetarët të mund të hynin për të filmuar./piranjat.al
