Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
AKTUALITET
Shqipëria, në hartën europiane të identifikimit të kafshëve, UEVP për marrëveshjen mes AKVMB dhe UPMVSH: Rruga e duhur drejt përafrimit me standardet europiane!
n.fPërditësimi i fundit 25 Maj 2025, 12:16
TIRANË- Presidenti i Urdhrit Veterinar, Ervin Resuli ka bërë një postim në rrjetet sociale ku ka njoftuar se Shqipëria ka hyrë në hartën europiane të identifikimit të kafshëve. Resuli shton se ky zhvillim historik për Shqipërinë është përshëndetur zyrtarisht nga një prej organizatave më të fuqishme të mjekëve veterinarë në Europë.
Ai thekson se Unioni Europian i Veterinerëve të Praktikës, UEVP ka vlerësuar si një hap madhor dhe strategjik marrëveshjen mes Autoritetit Kombëtar të Veterinarisë dhe Urdhrit Profesional të Mjekut Veterinar të Shqipërisë, për identifikimin dhe regjistrimin e kafshëve të shoqërimit.
UEVP shkruan se kjo marrëveshje vendos Shqipërinë në rrugën e duhur drejt përafrimit me standardet europiane, duke krijuar një sistem të gjurmueshëm, të sigurt dhe të mbështetur ligjërisht për mikroçipimin dhe pasaportimin e qenve dhe maceve. Vetëm veterinerë të licencuar do të kenë të drejtën të çipojnë dhe pasaportojnë.
Marrëveshja është firmosur më 30 prill 2025 nga presidenti i UPMVSH, Dr. Ervin Resuli, dhe drejtori i përgjithshëm i AKVMB, Sulejman Kulolli. Kjo marrëveshje parashikon që vetëm profesionistë të licencuar nga Urdhri do të kenë të drejtën ligjore të ushtrojnë këtë shërbim.
Ky sistem jo vetëm që garanton mirëqenie për kafshët, por mbron edhe shëndetin publik, duke ndihmuar në kontrollin e sëmundjeve të rrezikshme zoonotike si: tërbimi, lehismaniaza, echinokokoza dhe toksoplasmoza. Për UEVP-në, kjo marrëveshje është një shembull konkret i funksionimit të modelit europian në Shqipëri, ku Urdhri i Veterinerëve luan rolin e vet rregullator dhe garantues të standardeve të profesionit.
