Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Si përfitohet zbritja / rimbursimi nga DIVA për shpenzimet arsimore
n.fPërditësimi i fundit 7 Maj 2025, 08:15
TIRANË- Individët e punësuar dhe personat fizikë nga zbritja e shpenzimeve për arsimin e fëmijëve të moshës nën 18 vjeç nëpërmjet deklaratës vjetore të të ardhurave (DIVA) do të kenë mundësi të përfitojnë jo vetëm ulje tatimore, por edhe të kërkojnë rimbursim nga tatimet në rastet e tepricës kreditore.
Audituesi ligjor Julian Saraçi thotë se e drejta për përfitim rimbursimi bëhet për rastet kur të punësuarit dhe biznesi rezulton me tepricë kreditore.
“Në rastet kur pas dorëzimit të deklaratës në 31 mars 2026 (DIVA për të punësuarit ose deklarata e biznesit për personat fizikë) rezulton tepricë kreditore nga këto zbritje mund të kërkohet për rimbursim.
Sipas Nenit 75 të ligjit nr. 9920, nëse tatimpaguesi ka paguar më tepër tatim, administrata tatimore fillimisht përdor shumën e tepërt për të shlyer detyrime të tjera të papaguara.
Me miratimin me shkrim të tatimpaguesit, pjesa e mbetur ose i rimbursohet brenda 30 ditëve kalendarike ose kalohet për të mbuluar detyrimet e ardhshme”, shpjegon audituesi ligjor Julian Saraçi.
Ndërsa për sa i përket zbritjeve vjetore të shpenzimeve për arsimim në praktikë, kjo nënkupton që një familje me dy fëmijë të moshës nën 18 vjeç mund të përfitojë deri në 96,000 lekë zbritje për shpenzimet arsimore të fëmijëve dhe deri në 100,000 lekë për arsimin, nëse i plotëson kushtet që të ardhurat vjetore të jenë nën 1,2 milionë lekë, duke ulur ndjeshëm tatimin e përgjithshëm që duhet të paguajë.
Këto ndryshime vijnë si pjesë e Aktit Normativ nr. 7, datë 14.12.2023 të ligjit të ri “Për tatimin mbi të ardhurat”, i cili parashikon mbështetje fiskale për familjet përmes dy përfitimeve kryesore.
Sipas dispozitave të reja që hyjnë në fuqi më 1 janar 2025, përfitimet për individët do të jenë 48,000 lekë në vit zbritje nga baza tatimore për çdo fëmijë nën 18 vjeç, pa kufizim të të ardhurave; 100,000 lekë në vit zbritje për shpenzimet e dokumentuara për arsimimin e fëmijëve, por vetëm për individët me të ardhura vjetore nga punësimi më pak se 1,2 milion lekë.
Këto zbritje nuk do të aplikohen çdo muaj në pagë, por vetëm një herë në vit, kur plotësohet deklarata DIVA për të ardhurat personale.
Zbritjet do të bëhen përmes deklaratës vjetore DIVA, e cila dorëzohet për vitin tatimor 2025 deri më 31 mars 2026.
“Përveç zbritjeve standarde, parashikohet edhe një kompensim prej 48,000 lekësh për çdo fëmijë në ngarkim deri në 18 vjeç, si dhe deri në 100,000 lekë për shpenzimet e arsimit të fëmijëve, me kusht që të ardhurat vjetore të tatueshme të mos e kalojnë kufirin prej 1,2 milionë lekësh”, thotë audituesi ligjor Julian Saraçi.
Këto zbritje mund të kërkohen vetëm nga anëtari i familjes me të ardhura më të larta vjetore të tatueshme, përmes deklaratës vjetore të të ardhurave (për individët) ose deklaratës së tatimit mbi të ardhurat personale nga biznesi (për personat fizik). Për këtë kërkohen dokumente justifikuese, si certifikata familjare, kontrata me institucionet arsimore dhe faturat e pagesës./ Monitor
