Një zë i rëndësishëm në Kongresin e Shteteve të Bashkuara të Amerikës, republikania Alexandria Ocasio Cortez ka rea...
AKTUALITET
"S'kam punë me ty, kam me..."/ Zbardhet dëshmia e sekretares dhe nëpunësit gjyqësor për vrasjen e gjyqtarit Kalaja
PiranjatPërditësimi i fundit 15 Tetor 2025, 17:09
Detaje të reja kanë dalë nga ngjarja e rëndë e ndodhur në sallën e Gjykatës së Apelit Tiranë, ku u vra gjyqtari Astrit Kalaja pas përfundimit të një seance gjyqësore, nga dëshmitë e dhëna nga sekretarja e gjykatësit dhe nëpunësi gjyqësor, kanë zbardhur dinamikën e ngjarjes, ku përveç viktimës, mbetën të plagosur edhe dy persona të tjerë.
Sekretarja e Gjykatës së Apelit, e pranishme në sallën ku ndodhi krimi, ka dhënë dëshminë e saj para hetuesve, duke treguar çastet tronditëse pas shpalljes së vendimit.
Ajo thotë se autori, Elvis Shkambi, e qëlloi gjyqtarin sapo ai ishte ngritur për të dalë nga salla.
“Sapo shpalli vendimin, gjyqtari u ngrit dhe u kthye në krahun e tij të djathtë për të shkuar drejt dhomës së këshillimit. Në atë moment, Elvis Shkambi u afrua para podiumit dhe e qëlloi me pistoletë. U ngrita në këmbë dhe vendosa duart në kraharor. Ai më pa dhe më tha: ‘Nuk kam gjë me ty!’ – pastaj e qëlloi sërish gjyqtarin”, rrëfen sekretarja.
Bledar Panariti, nënpunës gjyqësor, ishte në sallën përballë kur dëgjoi të shtënat. Ai ka deklaruar se autori i dorëzoi armën pa rezistencë dhe u largua i qetë nga vendi i ngjarjes.
“Dëgjova mbi tre të shtëna që dukej se vinin nga brenda ambientit të gjykatës. Kur u afrova te salla nr. 3, pashë një burrë me shtat të shkurtër dhe fytyrë të rrumbullakët që doli me qetësi dhe më la në dorë një pistoletë. E futa instinktivisht në xhep dhe nisa të kërkoj ndihmë”, dëshmon Panariti.
Si ndodhi ngjarja
Krimi ndodhi pas përfundimit të një seance gjyqësore mbi një çështje pronësie me palët Elvis dhe Gjon Shkambi nga njëra anë, dhe Rakip e Ervis Kurtaj nga ana tjetër.
Vendimi i dhënë nga gjyqtari Kalaja ishte në disfavor të Shkambajve. Në ato çaste, Elvis Shkambi nxori armën dhe qëlloi tre herë në drejtim të gjyqtarit, duke e lënë të vdekur në vend.
Gjatë të njëjtit sulm, mbetën të plagosur edhe babë e bir, Rakip dhe Ervis Kurtaj, të cilët ishin të pranishëm në sallë si pala tjetër në procesin civil.
