Tentoi të fuste 15 mijë euro të padeklaruara në Shqipëri, procedohet penalisht 49-vjeçari malazez në Morinë

Foto ilustruese

MORINË- Një 49-vjeçar malazez është proceduar penalisht ditën e sotme. Mësohet se ai ka tentuar të fusë 15 mijë euro të padeklaruara në vendin tonë.

Sipas njoftimit të policisë mësohet se në makinën tip “Audi” gjatë kontrollit u gjetën 15 000 euro, të cilat ai po tentonte t’i fuste në Shqipëri, pa i deklaruar. Ndaj 49-vjeçarit ka nisur procedimi në gjendje të lirë për veprën penale “Mosdeklarimi në kufi i të hollave dhe i sendeve me vlerë”.

Njoftimi:

Sekuestrohet shuma e parave. Shërbimet e Policisë Kufitare, krahas zbatimit të marrëveshjes mes Shqipërisë dhe Kosovës, kanë rritur vigjilencën për goditjen e paligjshmërive në kufi. Në këtë kuadër, në bashkëpunim me autoritetet doganore, në hyrje të RSh-së, është kaluar në vijën e dytë, për kontroll të detajuar, automjeti tip “Audi” me drejtues shtetasin malazez F. D.

Gjatë kontrollit u gjetën 15 000 euro, të cilat ky shtetas po tentonte t’i fuste në Shqipëri, pa i deklaruar konform ligjeve në fuqi. Në vijim të veprimeve procedurale për rastin, u referuan materialet në Prokurori, ku nisi procedimi në gjendje të lirë për shtetasin malazez F. D., 49 vjeç, banues në Ulqin, për veprën penale “Mosdeklarimi në kufi i të hollave dhe i sendeve me vlerë”.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.

procedim para te padeklaruara morine