Gazetarja e njohur e Vlorës, Afrovita Hysaj ka treguar momentet e fundit të kolegut dhe mikut Enrik Mehmeti drejt Zvërnecit, mbrëmjen e t&...
AKTUALITET
Zgjerimi 'agresiv' i sektorit të ndërtimit/ Qeveria pranon zyrtarisht se Shqipëria ka 27.5 milionë m2 banesa të pabanuara
PiranjatPërditësimi i fundit 23 Tetor 2025, 16:14
Qeveria shqiptare ka pranuar zyrtarisht se vendi ka aktualisht 27.5 milionë metër katrorë ndërtesa të pabanuara, një shifër që nxjerr në pah përmasat e mëdha të një sistemi të paorganizuar të ndërtimit. Të dhënat janë bërë publike përmes Planit Kombëtar për Rinovimin e Ndërtesave, i hartuar nga studioja austriake Kommunalkredit Public Consulting GmbH, për llogari të Ministrisë së Infrastrukturës dhe Energjisë.
Sipas dokumentit, në vitin 2023, numri i përgjithshëm i ndërtesave rezidenciale në Shqipëri është 632,936, me një sipërfaqe totale prej 83.52 milion m2, nga të cilat 56.06 milion m2 janë të banuara. Kjo do të thotë se rreth 31% e stokut të ndërtimeve është bosh.
Çfarë e shkakton këtë mospërputhje?
Pjesa më e madhe e këtyre ndërtesave të pabanuara janë shtëpi të veçuara, që arrijnë në 14 milionë metra katrorë. Këto janë kryesisht banesa fshati, të cilat janë braktisur për shkak të zhvendosjes së popullsisë në zonat urbane dhe shpopullimit masiv të vendit. Megjithatë, Shqipëria ka një stok të madh banesash të pabanuara edhe në kategorinë e ndërtesave me shumë apartamente, me 9.63 milionë metra katrorë që janë bosh, kryesisht pallate.
Zgjerimi i sektori të ndërtimit dhe ndikimi i tij në ekonomi
Vitet e fundit, Shqipëria ka përjetuar një zgjerim të shpejtë të sektorit të ndërtimit rezidencial, me leje për kulla të larta dhe komplekse rezidenciale që po shtohen vazhdimisht, veçanërisht në qendrat urbane dhe zonat bregdetare. Megjithatë, ky zhvillim agresiv ka ngritur pyetje mbi orientimin e ekonomisë shqiptare, pasi ndërtesat e pabanuara po vazhdojnë të rriten në mënyrë të papërshtatshme me kërkesën reale për banesa.
Në fakt, shifrat tregojnë një mospërputhje të madhe mes kërkesës për ndërtime dhe ofertës në sektorin e ndërtimit. Një në tre apartamente dhe shtëpi janë të pabanuara, duke e bërë Shqipërinë një nga vendet me më shumë fshatra dhe qytete fantazmë në Europë. 31% e sipërfaqes totale të ndërtimeve është bosh, një nivel ndër më të lartat në kontinent.
Pse ka kaq shumë ndërtesa të pabanuara?
Një pjesë e ndërtimeve i përgjigjen kërkesës për banesa më moderne dhe me hapësira më të mëdha. Por mospërputhja e thellë mes kërkesës dhe ofertës ngre shqetësime për mënyrën se si ekonomia shqiptare është orientuar drejt një sektori që po krijon më shumë oferta se sa kërkesa reale për to. Pjesa më e madhe e këtyre banesave të pabanuara janë shtrirë në zona ku ka shpopullim të theksuar, dhe mund të cilësohen si një dëshmi e mospërdorimit të pasurive të krijuara.
