Banorët e Rrugës Ali Asllani, në zonën Kodër Kamëz (Njësia Bashkiake 11), kanë denoncuar pranë redaksisë s&e...
BOTA
32 alpinistë mbeten të bllokuar në Mont Blanc, kryebashkiaku refuzon helikopterin falas
PiranjatPërditësimi i fundit 13 Gusht 2026, 18:53
Një grup prej 32 alpinistësh mbeti i bllokuar në strehën Goûter, në rreth 3.800 metra lartësi në Mont Blanc, pasi autoritetet franceze kishin paralajmëruar për rrezikun e rrëshqitjeve të gurëve.
Kryebashkiaku i Saint-Gervais, Jean-Marc Peillex, refuzoi që për grupin të vihej në dispozicion një helikopter falas, duke argumentuar se alpinistët kishin vendosur të ngjiteshin pavarësisht paralajmërimeve.
Sipas autoriteteve lokale, kushtet për zbritje ishin përmirësuar dhe alpinistët mund ta vazhdonin rrugën në këmbë. Grupi kishte mbërritur në strehën Goûter përpara se ajo të mbyllej nga autoritetet për shkak të rrezikut.
Paralajmërimet për të shmangur ngjitjen ishin dhënë nga guidat alpine të Saint-Gervais, Chamonix dhe Courmayeur, si edhe nga zyra lokale e malit. Pavarësisht tyre, 32 alpinistët kishin vijuar ngjitjen drejt strehës.
Pas përmirësimit të kushteve, një pjesë e grupit zbriti në këmbë, ndërsa të tjerët u kthyen në luginë me një helikopter privat, duke paguar vetë koston e transportit.
Kryebashkiaku i Saint-Gervais kërkon që rasti të shërbejë si precedent për mënyrën se si organizohen operacionet e shpëtimit në Francë.
Sipas tij, helikopterët e emergjencës duhet të rezervohen për situatat ku ekziston një nevojë reale për ndërhyrje dhe jo për raste kur rreziku është marrë pavarësisht paralajmërimeve.
Bashkia ka publikuar edhe pamje të një rrëshqitjeje shkëmbinjsh në korridorin Goûter, një nga segmentet e itinerarit drejt majës së Mont Blanc. Zona konsiderohet e rrezikshme dhe, sipas të dhënave të cituara nga autoritetet lokale, gjatë dekadave të fundit rreth 80 persona kanë humbur jetën në këtë korridor.
