Detaje të reja janë mësuar në lidhje me ngjarjen në Roskovec, ku Besmir Mustaj ka qëlluar me armë zjarri në portë...
BOTA
32 ushtarakë kubanezë të vrarë gjatë operacionit të SHBA-së për kapjen e Maduros
PiranjatPërditësimi i fundit 5 Janar 2026, 09:46
Qeveria kubane ka njoftuar se 32 shtetas të saj janë vrarë gjatë operacionit të Shteteve të Bashkuara për kapjen e presidentit venezuelian, Nicolás Maduro.
Sipas autoriteteve në Havanë, viktimat ishin anëtarë të forcave të armatosura dhe agjencive të inteligjencës së Kubës. Me këtë rast, është shpallur dy ditë zie kombëtare.
Në një deklaratë të shkurtër, qeveria kubane nuk ka dhënë detaje mbi rolin konkret të shtetasve të saj në Venezuelë. Megjithatë, Kuba dhe Venezuela janë aleatë të hershëm, ndërsa Havana i ka ofruar Karakasit mbështetje sigurie në këmbim të furnizimeve me naftë.
Presidenti kuban Miguel Díaz-Canel deklaroi se forcat kubane kishin ofruar mbrojtje për Nicolás Maduro dhe bashkëshorten e tij, “me kërkesë të qeverisë venezueliane”. Në një komunikatë zyrtare thuhet se: Bashkatdhetarët tanë përmbushën detyrën e tyre me dinjitet dhe heroizëm dhe ranë pas një rezistence të ashpër, në përballje të drejtpërdrejta me sulmuesit ose si pasojë e bombardimeve të objekteve.
Nga ana tjetër, autoritetet venezueliane nuk kanë konfirmuar ende numrin e viktimave të operacionit amerikan të zhvilluar të shtunën në kompleksin presidencial në Karakas.
Pas kapjes së Maduro-s, janë shtuar spekulimet nëse administrata e presidentit amerikan Donald Trump mund të konsiderojë një operacion të ngjashëm edhe kundër Kubës, një tjetër vend që ka pasur për dekada marrëdhënie armiqësore me Shtetet e Bashkuara.
Duke folur për gazetarët të dielën, presidenti Trump deklaroi se një ndërhyrje ushtarake ndaj Kubës nuk do të ishte e nevojshme, pasi, sipas tij, “Kuba është gati të rrëzohet”.
“Nuk mendoj se kemi nevojë për ndonjë veprim. Duket se po bie. Është duke rënë plotësisht”, u shpreh Trump.
Ndërkohë, sekretari amerikan i Shtetit, Marco Rubio, e përshkroi Kubën si një “katastrofë”, e drejtuar nga “burra të paaftë dhe të mplakur”.
“Nëse do të jetoja në Havana dhe do të isha pjesë e qeverisë, do të isha të paktën pak i shqetësuar”, tha Rubio.
Në korrik të vitit të kaluar, Trump nënshkroi një memorandum që forconte më tej kufizimet ndaj Kubës, duke përmbysur disa masa lehtësuese të ndërmarra nga paraardhësi i tij, Joe Biden.
Shtëpia e Bardhë deklaroi se synon t’i japë fund “praktikave ekonomike që përfitojnë në mënyrë disproporcionale qeverinë, ushtrinë dhe shërbimet e sigurisë kubane, në dëm të popullit kuban”. Po ashtu, u njoftua se do të zbatohen më rreptësisht kufizimet ekzistuese për udhëtimet e qytetarëve amerikanë drejt Kubës.
Gjatë mandatit të tij të parë presidencial, Trump ndoqi një politikë të ngjashme ndaj Havanës, duke vendosur një sërë sanksionesh shtesë.
Administrata e tij ka vijuar embargon ekonomike ndaj Kubës, pavarësisht thirrjeve të organizatave ndërkombëtare, përfshirë Kombet e Bashkuara, për heqjen e saj. Bllokada u vendos për herë të parë në vitin 1962 dhe mbetet në fuqi edhe sot.
