Inspektorati i Lartë i Deklarimit dhe Kontrollit të Pasurive dhe Konfliktit të Interesit (ILDKPKI) raporton se gjatë vitit 2025 ka vijuar ...
BOTA
4 vrasje në tre ditë në Kosovë, Kurti: Duhet analizë profesionale, veprim institucional e reflektim shoqëror!
n.fPërditësimi i fundit 26 Mars 2025, 10:44
KOSOVË- Kryeministri i Kosovës, Albin Kurti në mbledhjen e sotme të Qeverisë ka folur në lidhje me katër vrasjet që janë regjistruar brenda kësaj jave në vend. Kurti u bëri thirrje hetuesve të angazhohen me seriozitetin më të lartë për të zbuluar shkaqet dhe rrethanat që çuan në 4 viktima në tre ditë.
Ai shtoi se vendi është tronditur nga këto ngjarje dhe se duhet zhvilluar një analizë profesionale për këto vrasje. Kurti theksoi se duhet veprim i menjëhershëm institucional dhe reflektim shoqëror.
“Dua të ndaj brengën e njëjtë me të gjithë ju në lidhje me katër vrasjet e regjistruara në tri ditët e fundit. Ftoj organet e rendit, hetuesisë që të trajtojnë me seriozitetin më të lartë shkaqet, rrethanat dhe predispozitat e dorasëve në mënyrë që edhe të vihet edhe drejtësi edhe të parandalohen akte të tilla. Vrasja është akti më i rëndë njeriu-njeriut, ajo asnjëherë nuk guxon të normalizohet. Vrasja është jo vetëm vrasje e njeriut, por edhe e shoqërisë në të cilën ai bënte pjesë, pra shoqërisë sonë.
Gjithë vendi është tronditur dhe lënduar nga kjo seri e vrasjeve që duhet të ndalohet dhe dënohet. Duhet natyrisht analizë e kujdesshme profesionale, veprim i menjëhershëm institucional, reflektim shoqëror që adreson dhunën që kemi parë në këto ditët e fundit. Kjo është thirrje për të gjithë ne. Edhe për faktin që këto vrasje ndodhën pikërisht në javën kur shënojmë 26-vjetorin e bombardimeve të NATO-s në Kosovë për ta ndalë gjenocidin e Serbisë dhe përkujtojmë masakrat e njëpasnjëshme të aparatit shtetëror të Serbisë që synonte shfarosjen e popullit shqiptar,” tha Kurti.
Ai më tej shprehu ngushëllime për familjet e viktimave, ndërsa tha se u qëndron pranë atyre.
“Shprehim ngushëllimet më të sinqerta familjeve të viktimave dhe u qëndrojmë pranë në këto ditë të vështira teksa ritheksojmë kërkesën për angazhim maksimal të organeve të rendit dhe të drejtësisë.” shtoi Kurti.
