DashiSot fuqitë tuaja bindëse janë në nivelin më të lartë. Kjo është një ditë e mirë për t&eu...
BOTA
Alarmohen Kina dhe Hong Kongu, supertajfuni “Ragasa” bën që të evakuohen rreth 2 mln banorë
PiranjatPërditësimi i fundit 24 Shtator 2025, 08:18
Hong Kongu dhe provinca Guangdong në Kinë po përgatiten për goditjen e supertajfunit “Ragasa”, stuhisë më të fortë të këtij viti, e cila tashmë ka shkaktuar dëme të mëdha në Filipine dhe ka evakuuar mijëra njerëz.
“Ragasa”, me erëra të fuqishme dhe reshje ekstreme, pritet të arrijë në brigjet kineze të mërkurën, duke kërcënuar miliona njerëz në Hong Kong, Shenzhen dhe rajonet përreth.Autoritetet në Hong Kong kanë rritur nivelin e paralajmërimit për tajfun në Numrin 8, vetëm dy nivele më poshtë nga maksimumi i mundshëm. Kjo tregon për erëra të forta me shpejtësi mbi 63 km/orë, me potencial për përkeqësim të mëtejshëm.
Si pjesë e masave parandaluese:
Shkollat dhe disa biznese janë mbyllur,
Raftet e supermarketeve janë boshatisur, ndërsa qytetarët janë përgatitur për izolim,
Aeroporti Ndërkombëtar i Hong Kongut ka paralajmëruar ndërprerje të mëdha të fluturimeve duke filluar nga ora 18:00 e së martës,
Më shumë se 500 fluturime të kompanisë Cathay Pacific pritet të anulohen,
Hong Kong Airlines ka pezulluar nisjet nga qyteti.
Edhe transporti publik do të reduktohet në orët në vijim, duke shtuar ndjeshëm pasigurinë dhe paralizën e qytetit.
Stuhia pritet të bëjë një “sulm frontal” edhe në provincën jugore kineze Guangdong, një zonë kyçe për industrinë ku ndodhen mijëra fabrika dhe objekte prodhimi.
10 qytete kineze janë urdhëruar të mbyllin shkollat dhe bizneset, ndërsa janë evakuuar 2 milionë banorë, duke u bërë thirrje të gjithëve të qëndrojnë në shtëpi.
Sipas meteorologëve, Ragasa është një nga stuhitë më të fuqishme të dekadës në rajon dhe mund të shkaktojë dëme të konsiderueshme në infrastrukturë, ndërprerje të energjisë dhe përmbytje të mëdha.
Autoritetet po bëjnë thirrje për kujdes të shtuar dhe ndjekje të udhëzimeve zyrtare, pasi përkeqësimi i motit mund të jetë i shpejtë dhe i rrezikshëm. Ndërkohë, ekipet e emergjencës dhe mbrojtjes civile janë në gatishmëri të plotë për ndërhyrje.
