Efektivi Edison Adri kishte marrë plumb në nofull dhe siç raportohet i ka ikur edhe gjuha.
Mjeku i Traumës konfirmoi se efektivi do fut...
BOTA
Ambasada e SHBA-së në Rusi kërkon lirimin e gazetares së REL-it, Alsu Kurmasheva
n.fPërditësimi i fundit 23 Korrik 2024, 15:43
Alsu Kurmasheva
SHBA- Ambasada e Shteteve të Bashkuara në Moskë bëri thirrje për lirimin e gazetares së Radios Evropa e Lirë, Alsu Kurmasheva, e cila ka shtetësi të dyfishtë - amerikane dhe ruse. Kurmasheva u dënua me gjashtë vjet e gjysmë burg nga një gjykatë ruse. Një ditë pasi u publikua lajmi për dënimin e saj, Ambasada amerikane tha se kjo është “një ditë e errët për gazetarinë në Rusi”.
“Ne, sërish, u bëjmë thirrje autoriteteve ruse që të lirojnë Alsunë dhe gazetarët e tjerë të burgosur”, tha Ambasada amerikane në një postim në mediat sociale më 23 korrik.
“Shtypja e zërave kundërshtues i dëmton të gjithë rusët. Një shtyp i lirë dhe i pavarur është në zemër të demokracisë”, shtoi Ambasada.
Presidenti i Radios Evropa e Lirë, Stephen Capus, e cilësoi gjyqin dhe dënimin e Kurmashevës - të raportuar fillimisht nga AP-ja - si “tallje me drejtësinë” dhe shtoi se “i vetmi vendim i drejtë është që Alsuja të lirohet menjëherë nga robëruesit e saj rusë”.
“Është koha, më shumë se kurrë, që kjo qytetare amerikane, kolegia jonë e dashur, të ribashkohet me familjen e saj të dashur”, tha Capus.
Kurmasheva, 47 vjeçe, nënë e dy fëmijëve, u arrestua në Kazan në tetor të vitit të kaluar dhe u akuzua për mosregjistrim si “agjente e huaj”. Regjistrimin e tillë e kërkon një ligj kontrovers rus, i cili ka në shënjestër gazetarë, aktivistë të shoqërisë civile dhe të tjerë.
Ajo u akuzua, gjithashtu, për përhapje të informacioneve të rreme për ushtrinë ruse dhe përballet me dhjetë vjet burg nëse shpallet fajtore. Radio Evropa e Lirë dhe Qeveria e SHBA-së thonë se akuzat janë hakmarrje për punën e saj si gazetare.
“Ajo është një gazetare e përkushtuar, që është në shënjestër të autoriteteve ruse, për shkak të përkushtimit të saj të pakompromis për ta thënë të vërtetën dhe për të raportuar në mënyrë parimore”, u tha gazetarëve zëdhënësi i Departamentit amerikan të Shtetit, Matthew Miller, pas lajmit për dënimin e saj.
“Gazetaria nuk është krim, siç na keni dëgjuar të themi në disa raste, dhe ne vazhdojmë ta bëjmë shumë të qartë se ajo duhet të lirohet”, shtoi ai.
Kremlini nuk e komentoi dënimin e Kurmashevës. Në të kaluarën, ai ka thënë se nuk po e ndjek nga afër rastin dhe se nuk do të komentojë, pasi sistemi rus i drejtësisë duhet të lejohet ta bëjë punën e vet./ REL
