Kongresmeni amerikan Jim McGovern ka reaguar me shqetësim për protestat në Shqipëri, duke i bërë thirrje qeverisë të nda...
BOTA
Britania i shpall luftë rrjeteve sociale: TikTok, Instagram dhe Snapchat ndalohen për nën 16-vjeçarët
PiranjatPërditësimi i fundit 15 Qershor 2026, 11:43
Kryeministri britanik, Keir Starmer, ka konfirmuar se fëmijëve nën moshën 16 vjeç do t’u ndalohet përdorimi i rrjeteve sociale, në një nga masat më të forta të ndërmarra ndonjëherë për mbrojtjen e të rinjve në internet.
Britania do të ndjekë shembullin e Australia, duke ndaluar aksesin e adoleshentëve në platforma si TikTok, Instagram dhe Snapchat. Gjatë një konference për shtyp në Downing Street, Starmer deklaroi se nuk është i gatshëm të bëjë kompromis me sigurinë dhe lumturinë e fëmijëve, duke theksuar se ndalimi do të zbatohet pavarësisht kundërshtimeve.
“Rrjetet sociale po i bëjnë fëmijët më të palumtur. Ato ua lehtësojnë ngacmuesve bullizimin dhe abuzimin, ndërsa i ekspozojnë të rinjtë ndaj përmbajtjeve të rrezikshme që synojnë të tërheqin vëmendjen me çdo kusht”, tha ai.
Sipas planit, ndalimi dhe një sërë kufizimesh të tjera pritet të hyjnë në fuqi jo më herët se pranvera e vitit të ardhshëm. Megjithatë, aplikacionet edukative si YouTube Kids, shërbimet e transmetimit të muzikës dhe aplikacionet e mesazheve si WhatsApp nuk do të preken nga masa.Qeveria britanike po shqyrton gjithashtu vendosjen e një “ore policore dixhitale” për të rinjtë 16 dhe 17 vjeç, si dhe kufizimin e teknologjisë së “scroll-it të pafund”, e cila i mban përdoruesit të lidhur me ekranin për orë të tëra.
Starmer argumentoi se këto platforma po u marrin fëmijëve fëmijërinë, duke i larguar nga detyrat e shkollës, leximi, aktivitetet në natyrë dhe gjumi i rregullt.
Megjithatë, jo të gjithë janë të bindur se ndalimi do të funksionojë. Kritikët paralajmërojnë se shumë adoleshentë mund ta anashkalojnë masën përmes përdorimit të VPN-ve, ndërsa të tjerë argumentojnë se ndalimi total mund të krijojë probleme për të rinjtë që do të hyjnë papritur në botën e rrjeteve sociale pas moshës 16 vjeç.
Sondazhet tregojnë se shumica e prindërve e mbështesin këtë vendim. Rreth 83 për qind e tyre besojnë se rreziqet e rrjeteve sociale janë më të mëdha se përfitimet, ndërsa 9 në 10 prindër mbështesin vendosjen e moshës minimale 16 vjeç për përdorimin e tyre.
Nga ana tjetër, 72 për qind e fëmijëve të anketuar shprehën shqetësimin se mund të ndihen të përjashtuar nga shoqëria nëse masa hyn në fuqi. Debati mbetet i hapur, por qeveria britanike këmbëngul se ky është një hap i domosdoshëm për mbrojtjen e brezit të ri nga efektet e dëmshme të botës dixhitale./Përktheu Piranjat News
