Banorë të zonës së Durrësit të Ri, e njohur ndryshe si Ish-Këneta, kanë protestuar mbrëmjen e sotme në Durr&eu...
BOTA
E ardhmja e modës/ A do ta prodhojnë robotët bluzën tuaj të ardhshme?
PiranjatPërditësimi i fundit 21 Maj 2026, 10:00
Robotët sot përdoren për të montuar makina, për të kryer operacione kirurgjikale dhe për të menaxhuar ngarkesa në aeroporte. Megjithatë, kur vjen puna te industria e veshjeve, ata hasin një vështirësi të madhe: qepjen e pëlhurës. Ky proces kërkon saktësi dhe fleksibilitet të lartë, diçka që robotët ende nuk e zotërojnë plotësisht.
Për këtë arsye, shumica e rrobave në botë prodhohen ende me dorë, shpesh në fabrika në Azi, ku puna është e lodhshme dhe paguhet pak. Edhe pse përdoren makina qepëse, automatizimi i plotë i prodhimit të veshjeve mbetet shumë i vështirë.
Disa kompani po përpiqen ta ndryshojnë këtë model. Një prej tyre, CreateMe në SHBA, po përdor një metodë të re: në vend të qepjes, copat e pëlhurës ngjiten me ngjitës të veçantë. “Pasi vendoset ngjitësi, thjesht vendoset pjesa tjetër sipër dhe shtypet,” shpjegon themeluesi Cam Myers. Sipas tij, robotët tashmë po prodhojnë të brendshme femrash dhe së shpejti do të fillojnë edhe prodhimin e bluzave.
Kjo qasje synon të ndryshojë mënyrën se si prodhohen rrobat, duke e bërë të mundur që një pjesë e prodhimit të kthehet në vendet perëndimore si SHBA apo Evropa. Por kjo ngre edhe shqetësime serioze, pasi mund të rrezikojë miliona vende pune në industrinë e tekstilit.
Një tjetër përfitim i mundshëm është ndikimi në mjedis. Industria e modës prodhon sasi të mëdha mbetjesh çdo vit dhe konsumon shumë ujë. Prodhimi i automatizuar dhe sipas kërkesës mund të ulë mbiprodhimin dhe ndotjen, si dhe të reduktojë emetimet e karbonit.
Megjithatë, ekspertët mbeten të ndarë. Disa besojnë se robotët do të jenë në gjendje të qepin rroba në mënyrë konkurruese, ndërsa të tjerë theksojnë se qepja mbetet pjesë e rëndësishme e dizajnit dhe nuk mund të zhduket plotësisht.
Sfida kryesore është kompleksiteti i madh i industrisë së veshjeve: konsumatorët kërkojnë shumë stile, ngjyra dhe forma të ndryshme, gjë që e bën automatizimin e plotë shumë të vështirë.
Në të ardhmen, ekspertët parashikojnë jo një zëvendësim total të njerëzve, por një bashkëpunim mes tyre dhe robotëve, ku makinat do të merren me punët e përsëritura, ndërsa njerëzit do të fokusohen te dizajni dhe krijimi./Përktheu Piranjat News
