Presidenti i SHBA, Donald Trump ka sulmuar kryeministren italiane, Giorgia Meloni pas Samitit të G7, ku duhej se e kishin kapërcyer hendekun mes tyr...
BOTA
E pazakontë/ Djali i Rob Reiner mund të trashëgojë 196 milionë dollarë edhe nëse shpallet fajtor për vrasjen e prindërve
PiranjatPërditësimi i fundit 3 Mars 2026, 16:44
Në një gjykatë në Los Anxhelos të hënën, Nick djali me probleme i Rob Reiner u deklarua i pafajshëm për akuzat që lidhen me vrasjet brutale.
Nick i cili ka një histori me skizofreni, abuzim me substanca dhe probleme të shëndetit mendor, u paraqit në bankën e të akuzuarve me sy të zgurdulluar dhe dukshëm i trazuar, ndërsa avokati i tij paraqiti deklarimin e pafajësisë në emrin e tij.
Ai është akuzuar për dy vepra penale të vrasjes së shkallës së parë lidhur me një sulm me thikë dhe, nëse shpallet fajtor, përballet me një dënim maksimal me burgim të përjetshëm. Avokatët besojnë se gjendja e tij mendore mund të luajë një rol kyç në gjyqin e ardhshëm.
Megjithatë, ekspertë amerikanë të trashëgimisë kanë ngritur një çështje shqetësuese ligjore që mund të nënkuptojë të paimagjinueshmen – Reiner mund të trashëgojë një pjesë të pasurisë familjare prej 196 milionë dollarësh edhe nëse shpallet fajtor.
Çuditërisht, sipas ligjit të Kalifornisë, një dënim për vrasje nuk e përjashton automatikisht të drejtën për trashëgimi.
Ndërsa i ashtuquajturi “Slayer Rule” (Rregulli i Vrasësit) ndalon një person të trashëgojë pasurinë e atij që ka vrarë, ky rregull nuk zbatohet për personat që shpallen ligjërisht të çmendur (të papërgjegjshëm mendërisht).
Eksperti i trashëgimisë John Hilbert, nga Heir Hunters International me bazë në Los Anxhelos, i tha The US Sun:
“Rregulli i vrasësit është më i ngushtë sesa mendojnë shumica e njerëzve. Ai zbatohet vetëm nëse një gjykatë trashëgimie konstaton se vrasja ishte si e qëllimshme ashtu edhe penale (kriminale). Një dënim penal mund të jetë i rëndësishëm, por vetëm dënimi nuk është vendimtar sipas ligjit të Kalifornisë kur bëhet fjalë për trashëgiminë.
Ky dallim është thelbësor, sepse gjykatat e trashëgimisë veprojnë në mënyrë të pavarur nga gjykatat penale dhe zbatojnë një standard tjetër ligjor.
Çështja penale përcakton fajësinë përtej çdo dyshimi të arsyeshëm; ndërsa gjykata e trashëgimisë vendos veçmas nëse aktivizohet Rregulli i Vrasësit për qëllime trashëgimie, sipas një standardi shumë më të ulët – provë e qartë dhe bindëse.”
Hilbert theksoi se, megjithëse një argument i tillë është i pazakontë, nuk është pa precedent. Ai përmendi çështjen “Estate of Ladd”, ku Gloria Ladd vrau dy djemtë e saj adoleshentë, James dhe John, në vitin 1979.
Ajo u shpall fajtore për vrasje të shkallës së parë dhe njëkohësisht u konstatua ligjërisht e çmendur në momentin e krimit.
Megjithatë, Gjykata e Apelit e Kalifornisë vendosi se, për shkak se Ladd ishte shpallur ligjërisht e çmendur, ajo nuk zotëronte “qëllimin” e kërkuar nga ligji, çka do të thotë se nuk u ndalua nga trashëgimia. Hilbert shtoi:
“Gjykata ishte e qartë se ligji nuk duhet të zgjerohet përtej termave të tij të saktë. Kjo është një mundësi reale edhe në rastin Reiner.”
Zhvillimet në çështje
Të hënën, Prokurori i Qarkut të Los Anxhelosit, Habib Balian, tha se zyra e tij ende pret raportin e plotë të autopsisë, por se të gjitha provat e tjera i janë dorëzuar mbrojtjes.
Gjykatësi ia ka kaluar çështjen një gjyqtari të ri afatgjatë, i cili do të mbikëqyrë procedurat në vazhdim.
Kronologjia e vdekjes së Rob dhe Michele Reiner
Michele Singer Reiner, bashkëshortja e Rob Reiner, u gjet e vdekur së bashku me të në shtëpinë e tyre në Los Anxhelos më 14 dhjetor 2025. Kronologjia:
• 13 dhjetor 2025: Rob dhe Michele morën pjesë në një festë fundviti së bashku me djalin e tyre, Nick. Burime i thanë The U.S. Sun se ata patën një debat të ashpër publik gjatë eventit.
• 14 dhjetor 2025: Çifti u gjet i vdekur në shtëpinë e tyre në Brentwood, Los Anxhelos, rreth orës 15:30 (PST). Vajza e tyre, Romy, raportohet se zbuloi trupat.
• Nick, 32 vjeç, u arrestua në orën 21:15 (PST) dhe më 15 dhjetor autoritetet njoftuan zyrtarisht akuzat për vrasje. Ai u regjistrua në burgun e Los Anxhelosit në orën 05:04 me një garanci prej 4 milionë dollarësh, e cila më pas u anulua.
• 16 dhjetor 2025: Prokurori i Qarkut të Los Anxhelosit, Nathan Hochman, e akuzoi zyrtarisht për dy vrasje të shkallës së parë dhe tha se po shqyrtohet mundësia e dënimit me vdekje.
• 23 dhjetor 2025: Certifikatat e vdekjes zbuluan se çifti vdiq nga “plagë të shumta me mjet prerës të mprehtë”, të shkaktuara “me thikë, nga një tjetër person”.
Nick Reiner është urdhëruar të paraqitet sërish në gjykatë më 29 prill për të përcaktuar nëse ka prova të mjaftueshme për të kaluar në gjyq.
Gjendja e tij mendore pritet të jetë në qendër të procedurave fillestare, pasi sipas burimeve të cituara nga NBC News, ai ishte diagnostikuar me skizofreni para vrasjeve të prindërve.
Ai ndodhet në paraburgim pa të drejtë lirimi me kusht që nga arrestimi, vetëm disa orë pasi trupat e prindërve u gjetën në shtrat.
Rob dhe Michele u panë për herë të fundit publikisht vetëm disa orë para vdekjes në një festë Krishtlindjesh të organizuar nga komediani amerikan Conan O'Brien.
O’Brien ka reaguar për humbjen shkatërruese të miqve të tij, duke thënë se është ende “e vështirë për ta kuptuar” këtë tragjedi./Piranjat News
