Përpara bllokut të sigurisë pranë Komisariatit nr. 3 në Tiranë, një burrë 54-vjeçar përpiqet të mbaj&...
BOTA
Fraksionet palestineze: Një komitet teknokrat i pavarur të drejtojë Gazën
PiranjatPërditësimi i fundit 24 Tetor 2025, 23:38
Fraksionet kryesore palestineze kanë thënë se kanë rënë dakord që një komitet i pavarur teknokratësh do të marrë përsipër drejtimin e Gazës, pasi Hamasi tha se kishte marrë "garanci të qarta" nga ndërmjetësuesit se "lufta ka përfunduar në mënyrë efektive".
Një deklaratë e përbashkët e publikuar në faqen e internetit të Hamasit tha se grupet kishin rënë dakord në një takim në Kajro për t'ia dorëzuar "administrimin e Rripit të Gazës një komiteti të përkohshëm palestinez të përbërë nga 'teknokratë' të pavarur, i cili do të menaxhojë çështjet e jetës dhe shërbimeve bazë në bashkëpunim me vëllezërit arabë dhe institucionet ndërkombëtare".
Deklarata bëri thirrje gjithashtu për një takim për të “rënë dakord mbi një strategji kombëtare dhe për të rigjallëruar Organizatën për Çlirimin e Palestinës (PLO) si përfaqësuesja e vetme legjitime e popullit palestinez”. Hamasi nuk është pjesë e PLO-së, e cila dominohet nga rivali i saj i hershëm Fatah.
Deklarata vjen ndërsa gruaja e udhëheqësit më të popullarizuar të palestinezëve, Marwan Barghouti, i bëri thirrje të premten Donald Trump të ndërhyjë për lirimin e burrit të saj nga një burg izraelit, pasi Presidenti i SHBA-së tha se do të "merrte një vendim" për këtë çështje.
Në një letër drejtuar Trump, Fadwa Barghouti, burri i së cilës po vuan dënime të shumta me burgim të përjetshëm që nga viti 2002 për sulme vdekjeprurëse ndaj izraelitëve, por që shihet nga shumë palestinezë si një udhëheqës i mundshëm që mund të bashkojë lëvizjen e tyre kombëtare, i kërkoi Trump të nxisë lirimin e tij.
“Z. President, ju pret një partner i vërtetë – dikush që mund të ndihmojë në përmbushjen e ëndrrës që ndajmë për paqe të drejtë dhe të qëndrueshme në rajon”, thuhej në apelin e saj. “Për hir të lirisë për popullin palestinez dhe paqes për të gjitha brezat e ardhshëm, ndihmoni në lirimin e Marwan Barghouti.”
