Qytetarë, ambientalistë dhe aktivistë të shoqërisë civile janë mbledhur këtë mbrëmje në Tiranë p&e...
BOTA
Hyri fshehurazi në ishullin e Jeffrey Epstein, amerikani rrëfen momentet e tmerrit: Më lidhën dhe më futën në...
PiranjatPërditësimi i fundit 24 Maj 2026, 18:19
Misteri i ishullit të Jeffrey Epstein rikthehet në qendër të vëmendjes pasi një amerikan pretendon se u kap, u lidh dhe u mbajt i izoluar pasi hyri pa leje në pronën famëkeqe Little St. James, vendi që prej vitesh lidhet me akuzat për trafikim seksual dhe abuzime ndaj të miturave.
Benjamin Owen, 44 vjeç nga Memphis, mbërriti në Ishujt e Virgjër më 24 prill së bashku me dy persona të tjerë. Sipas tij dhe bashkëpunëtorit Ryan Dalton, qëllimi i udhëtimit ishte hyrja në ishullin e dikurshëm të Jeffrey Epstein, Little St. James.
Owen deklaroi se sapo mbërriti në ishull një ditë më vonë, ai u kap, iu lidhën duart dhe këmbët, iu vendos fashë në sy dhe u fut në një dhomë që ai e përshkroi si “birucë”, ku qëndroi për disa orë derisa mbërriti policia e Ishujve të Virgjër dhe e arrestoi.
“Nuk besoj se ishte menduar të largohesha i gjallë nga ai ishull”, deklaroi ai për CBS News.
Dokumentet gjyqësore tregojnë se brenda vetëm gjashtë javësh kanë ndodhur të paktën dy episode të hyrjeve të paautorizuara në ishull, ku janë përfshirë të paktën pesë persona.
Megjithatë, nuk përfunduan në telashe vetëm personat që hynë pa leje. Autoritetet ngritën akuza edhe ndaj disa punonjësve të ishullit, mes tyre edhe një person që kishte administruar pronën për Jeffrey Epstein për dekada dhe që vazhdon të punojë për pronarin e ri.
Sipas policisë, punonjësit që kapën personat e futur në mënyrë të paligjshme i zhveshën dhe i lidhën.
Owen këmbëngul se misioni i tij nuk kishte lidhje me aventurën apo famën në internet. Ai pretendon se udhëtimi ishte një përpjekje për të tërhequr vëmendjen mbi vuajtjet e viktimave të trafikimit seksual.
Por kompania që administron ishullin reagoi ashpër dhe ngriti padi civile ndaj Owen dhe shoqëruesve të tij, duke i cilësuar si “kërkues fame në internet” dhe “teoricienë konspiracioni”.
Sipas padisë, ata janë pjesë e një grupi gjithnjë e më të madh influencuesish, YouTuber-ësh dhe eksploruesish urbanë që përfitojnë nga fama dhe historia e errët e ishullit të Epstein.
Prona aktualisht kontrollohet nga miliarderi Stephen Deckoff, themelues i Black Diamond Capital Management, i cili e bleu ishullin në vitin 2023 përmes kompanisë së investimeve SD Investments, me planin për ta kthyer në resort turistik.
Një zëdhënës i pronës deklaroi se ka pasur rritje shqetësuese të personave që futen pa leje në Little St. James dhe paralajmëroi se çdo hyrje në zonat e brendshme apo ndërhyrje në strukturat e ishullit do të trajtohet si shkelje e ligjit.
Little St. James u ble nga Jeffrey Epstein në vitin 1998 dhe më vonë u bë një nga vendet më të përfolura në SHBA, pasi autoritetet e Ishujve të Virgjër e akuzuan financierin e ndjerë se kishte transportuar vajza të mitura drejt ishullit me avionë dhe helikopterë për t’i abuzuar seksualisht.
Pas arrestimit të Epstein në vitin 2019 dhe vdekjes së tij në burg një muaj më vonë, Ishujt e Virgjër ngritën padi civile ndaj pasurisë së tij, ndërsa çështja u mbyll në vitin 2022 me një marrëveshje prej 105 milionë dollarësh.
Një tjetër detaj që ka ngjallur debat është fakti se Ryan Dalton, një nga personat që udhëtoi drejt ishullit, vazhdon të besojë se Epstein mund të jetë ende gjallë dhe i fshehur, një teori që është kundërshtuar gjerësisht, por që vazhdon të qarkullojë në internet.
Ndërkohë, Owen pranoi edhe të kaluarën e tij problematike, duke e përshkruar veten si ish-përdorues droge “crack” dhe me 19 dënime për kundërvajtje. Ai tha se synonte të vendoste në ishull flamurin e organizatës së tij jofitimprurëse “We Fight Monsters”, e cila merret me rehabilitimin e të varurve, mbështetjen e viktimave të trafikimit seksual dhe veteranëve të pastrehë në Memphis./Përktheu Piranjat News
