Analisti Endri Tafani, i ftuar në emisionin “Kafe Shqeto” në Syri TV, ka kritikuar kryeministrin Edi Rama, duke e cilësuar atë...
BOTA
I shpërfytyruar nga sulmi/ Khamenei i nënshtrohet operacioneve plastike, The New York Times: Do t'i vendosin edhe protezë
PiranjatPërditësimi i fundit 23 Prill 2026, 17:43
Presidenti i Iranit, Masoud Pezeshkian, me profesion kirurg kardiak, ka marrë përsipër trajtimin mjekësor të Udhëheqësit Suprem Mojtaba Khamenei, i cili dyshohet se është plagosur gjatë sulmeve ajrore të 28 shkurtit. Lajmi është raportuar nga The New York Times, ndërsa deri më tani mungon një konfirmim zyrtar për gjendjen e tij.
Sipas raportimit, në procesin e trajtimit është përfshirë edhe Ministri iranian i Shëndetësisë. Ndërkohë, televizioni Al Arabiya bën të ditur se kontaktet me Khamenein janë kufizuar ndjeshëm dhe realizohen kryesisht vetëm nga stafi i tij mjekësor.
Burime iraniane citojnë se Khamenei i është nënshtruar disa ndërhyrjeve kirurgjikale, përfshirë një operacion në dorë dhe tre ndërhyrje në këmbë, ndërsa pritet të pajiset me një protezë. Po ashtu, ai raportohet të ketë pësuar djegie të rënda në fytyrë dhe buzë, që kanë ndikuar në aftësinë për të komunikuar dhe mund të kërkojnë ndërhyrje plastike.
The New York Times thekson se, pavarësisht plagëve, Khamenei mbetet “i kthjellët mendërisht dhe aktiv”, sipas burimeve. Në të njëjtën kohë, Al Arabiya raporton se zyrtarët e lartë të Gardës Revolucionare Islamike dhe të qeverisë shmangin vizitat, për shkak të frikës nga monitorimi i mundshëm dhe rreziku për t’u shënjestruar.
Raportimet shtojnë se komunikimi me Udhëheqësin Suprem realizohet përmes mesazheve të shkruara me dorë, të dorëzuara përmes një rrjeti korrierësh.
Sipas medias amerikane, ndryshe nga paraardhësi i tij, Ali Khamenei, i cili ushtronte kontroll të plotë mbi vendimmarrjen strategjike, Mojtaba Khamenei paraqitet me një profil të ndryshëm në ushtrimin e pushtetit.
Plagosja e tij lidhet drejtpërdrejt me sulmet ajrore të 28 shkurtit, në fillim të konfliktit mes Iranit dhe një koalicioni të udhëhequr nga Shtetet e Bashkuara dhe Izraeli. Sipas raportimeve, ai u lëndua gjatë bombardimeve që goditën zonën ku ndodhej kompleksi i udhëheqjes në Teheran.
Në të njëjtin sulm, mësohet se humbi jetën edhe babai i tij, Ali Khamenei, së bashku me disa anëtarë të familjes.
Megjithatë, për shkak të mungesës së tij në publik, fati i Mojtaba Khamenei vijon të mbetet i paqartë. Që nga momenti i plagosjes dhe marrja e detyrës si udhëheqës suprem, ai nuk është shfaqur në video apo dalje publike./PiranjatNews/
