Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
BOTA
Ish-komandanti i trupave ajrore ruse "godet" Ministrinë e Mbrojtjes së vendit të tij
E.DPërditësimi i fundit 12 Qershor 2024, 13:51
RUSI- Një gjeneral rus në pension ka kritikuar ministrinë e mbrojtjes të vendit për furnizimin e trupave pjesëmarrëse në luftën në Ukrainë me uniforma të cilësisë së dobët. Vërejtjet u bënë nga zëvendëskryetari i Komitetit të Mbrojtjes të Dumës së Shtetit Rus, Vladimir Shamanov, një ish-komandant i përgjithshëm i trupave ajrore ruse, në një fjalim në dhomën e ulët të parlamentit.
Kritikat publike ndaj ushtrisë së presidentit Vladimir Putin janë të rralla, duke pasur parasysh se parlamenti rus miratoi legjislacionin në mars të vitit 2022 që vendosi dënime me burg deri në 15 vjet për përhapjen e qëllimshme të lajmeve të rreme për ushtrinë e vendit. Kremlini e ka përdorur ligjin për të goditur ata që shmangen nga narrativa e Putinit për luftën, madje ka akuzuar dhe burgosur ushtarakët e vet për diskreditim të forcave të armatosura të vendit.
Shamanov drejtoi trupat ajrore ruse nga maji 2009 deri në tetor 2016 dhe u bë kryetar i Komitetit të Mbrojtjes të Dumës Shtetërore pasi la atë pozicion. Duke iu drejtuar Dumës së Shtetit, Shamanov e krahasoi ushtrinë ruse me një detashment partizan, duke pretenduar se ushtarët rusë po detyrohen të “vishen vet” pasi uniformat ushtarake të ofruara janë të një cilësie kaq të dobët.
“Cilësia e uniformave që sillen dhe jepen thjesht nuk i nënshtrohet asnjë vlerësimi”, citohet të ketë thënë gjeneralkoloneli në pension.
Raportet për mungesën e pajisjeve brenda ushtrisë ruse filluan të qarkullojnë vetëm disa javë pas fillimit të luftës, në maj 2022. Disa ushtarakë që folën për gazetën e pavarur në internet “The Moscow Times” në kushte anonimiteti thanë se atyre nuk po u jepeshin sende bazë si këpucë, parzmore, fasho dhe pretenduan se duhej të blinin pajisje duke përdorur paratë e tyre. Madje, në nëntor 2022, ushtria e Ukrainës pretendoi se rekrutëve rusë të dislokuar në vijën e frontit u jepeshin uniformat e trupave të vdekur.
