Deputeti i Partisë Demokratike Saimir Korreshi komentoi deklaratën e kryeministrit Edi Rama se prindërit e studentëve duhet të paguajn&...
BOTA
Marrëveshja me Iranin, Trump i zemëruar me vendimin e Senatit: Po ma vështirësojnë punën
PiranjatPërditësimi i fundit 24 Qershor 2026, 08:38
Senati i Shteteve të Bashkuara ka miratuar një rezolutë historike që synon të kufizojë aftësinë e Presidentit Donald Trump për të ndërmarrë veprime ushtarake të njëanshme kundër Iranit pa miratimin e Kongresit.
Rezoluta u miratua me 50 vota pro dhe 48 kundër, falë mbështetjes së katër senatorëve republikanë – Rand Paul, Lisa Murkowski, Susan Collins dhe Bill Cassidy – të cilët votuan së bashku me demokratët. Nga ana tjetër, senatori demokrat John Fetterman votoi kundër masës.
Dokumenti ishte miratuar më herët edhe nga Dhoma e Përfaqësuesve dhe i kërkon presidentit që t’i japë fund operacioneve ushtarake ose të sigurojë autorizimin formal të Kongresit. Kjo është hera e parë që nga miratimi i Aktit të Pushteteve të Luftës në vitin 1973 që të dyja dhomat e Kongresit miratojnë një masë të tillë.
Presidenti Donald Trump reagoi menjëherë pas votimit, duke e cilësuar rezolutën si të “parakohshme dhe të pakuptimtë”. Në një postim në rrjetin e tij social “Truth Social”, ai akuzoi senatorët që mbështetën nismën se po i dërgonin sinjale dobësie Iranit dhe po ndihmonin një shtet që e konsideron sponsor të terrorizmit.
Trump deklaroi se katër republikanët që votuan kundër qëndrimit të tij “vetëm sa ia vështirësuan punën”, por shtoi se do ta çojë përpara politikën e tij “në një mënyrë ose në një tjetër”.
