Pas më shumë se tre orësh qëndrese dhe tubimi përpara zyrës së kryeministrit Edi Rama, qytetarët e revoltuar kanë m...
BOTA
Masakër/ 19 punëtorë fermash ekzekutohen në një fshat të kontrolluar nga bandat kriminale, vriten edhe 4 policë
PiranjatPërditësimi i fundit 22 Maj 2026, 08:25
Një valë e rëndë dhune ka goditur Hondurasin, ku të paktën 19 punëtorë fermash janë vrarë në një masakër në veri të vendit, ndërsa katër efektivë policie humbën jetën në një sulm të veçantë me armë zjarri.
Ngjarja më e rëndë ndodhi gjatë natës në fshatin Rigores, pranë qytetit Trujillo, një zonë që sipas autoriteteve kontrollohet nga organizata kriminale të përfshira në pushtimin e paligjshëm të tokave dhe shfrytëzimin e plantacioneve të palmave.
Zëdhënësi i prokurorisë, Yuri Mora, deklaroi për mediat lokale se viktimat u gjetën në dy vende të ndryshme. Në njërin vend u identifikuan 13 trupa, ndërsa në tjetrin gjashtë të tjerë.
Pamjet e transmetuara nga mediat rajonale treguan trupa të pajetë të shpërndarë në fushat e zonës, ndërsa autoritetet dyshojnë se viktimat janë ekzekutuar me armë të kalibrit të rëndë.
Ministri i Sigurisë, Kherson Velasquez, tha se masakra ka përmasa të paprecedenta për rajonin, ku prej vitesh vazhdon konflikti mes grupeve të lidhura me trafikun e drogës dhe pushtimin e tokave.
Sipas kreut të policisë në Trujillo, Carlos Rojas, organizatat kriminale kanë marrë kontrollin e plantacioneve të palmave dhe përdorin fitimet për t’u armatosur dhe për të mbajtur nën kontroll territorin.
Në të njëjtën kohë, katër oficerë policie dhe një civil u vranë në një shkëmbim zjarri me trafikantë të dyshuar droge në rajonin Omoa, pranë kufirit me Guatemalën.
Pas ngjarjeve të rënda, qeveria ka urdhëruar dislokimin e forcave shtesë policore dhe ushtarake në zonat e prekura.
Dhuna vjen në një moment kur parlamenti i Hondurasit ka miratuar reforma të reja për luftën kundër krimit të organizuar, duke përfshirë përfshirjen më të madhe të ushtrisë në operacionet policore dhe klasifikimin e bandave kriminale si organizata terroriste.
