Një zarf që përmbante një plumb dhe një letër me fraza kërcënuese është dërguar në Ministrinë...
BOTA
Në mes të krizës globale të naftës, Greqia hap “thesin”: Subvencione direkt për karburantin, qytetarët përfitojnë deri në 60 euro
PiranjatPërditësimi i fundit 6 Prill 2026, 17:50
Në një kohë kur e gjithë bota po përballet me një rritje të ndjeshme të çmimeve të naftës, qeveria greke ka ndërmarrë hapa konkretë për të lehtësuar barrën financiare të qytetarëve të saj. Një nga masat kryesore është subvencionimi i karburantit përmes skemës së njohur si “Fuel Pass III”.
Programi ka hyrë tashmë në fuqi dhe qytetarët mund të aplikojnë online përmes platformës vouchers.gov.gr, duke përdorur kredencialet e tyre personale. Procesi është i thjeshtë: aplikantët konfirmojnë të dhënat e kontaktit, deklarojnë automjetin për të cilin kërkojnë përfitimin dhe zgjedhin mënyrën e pagesës.
Subvencioni mund të përfitohet në dy forma, përmes një karte debiti dixhitale ose përmes transfertës direkte në llogari bankare. Autoritetet kanë bërë të ditur se aplikimet e para do të përpunohen me shpejtësi, ku qytetarët që aplikojnë në ditët e para do të marrin pagesën brenda 48 orëve.
Sa i përket vlerës së përfitimit, ajo ndryshon në varësi të mjetit dhe zonës së banimit. Për automjetet, qytetarët përfitojnë deri në 60 euro në zonat ishullore dhe 50 euro në pjesën tjetër të Greqisë. Ndërsa për motoçikletat, subvencioni arrin në 35 euro për ishujt dhe 30 euro për zonat e tjera.
Kjo masë është parashikuar të zbatohet për muajt prill dhe maj, ndërsa çdo shumë e papërdorur do të mbetet e vlefshme deri në fund të korrikut.
Përfitues të kësaj skeme janë qytetarët rezidentë në Greqi që plotësojnë kriteret e të ardhurave, të cilat variojnë deri në 25 mijë euro për individët beqarë dhe deri në 35 mijë euro për çiftet, me shtesa për çdo fëmijë në ngarkim.
Me këtë nismë, qeveria greke synon të zbusë ndikimin e krizës dhe të mbështesë drejtpërdrejt familjet dhe individët në përballimin e kostove të përditshme të transportit.
