Spitalet vijojnë të kenë mangësi në pajisje, përveç mungesëa së konstatuar dhe të ngritur si problematik&e...
BOTA
Nëna e dy fëmijëve u zhduk 34 vite më parë, policia gërmon në oborrin e kishës
PiranjatPërditësimi i fundit 10 Gusht 2026, 23:23
Policia që po heton zhdukjen e një nëne të dy fëmijëve, e cila humbi pa gjurmë 34 vite më parë, ka nisur të gërmojë në një parking në kërkim të provave të reja.
Patricia Hall, 39 vjeçe në atë kohë, u zhduk më 25 janar 1992, gjatë një dite që po kalonte me familjen në Ripon, North Yorkshire.
Policia e West Yorkshire ka nisur gërmimet pranë Kishës Moraviane në Fulneck, Leeds, pasi hetuesit morën informacione të reja lidhur me zhdukjen e Patricia-s.
Megjithatë, policia bëri të ditur sot se deri tani “nuk është gjetur asgjë me rëndësi”.
Autoritetet kanë publikuar edhe pamje nga vendi ku po zhvillohen kërkimet, ku shihen punëtorë pranë disa qeseve të mëdha të zeza.
Edhe pse hetuesit nuk kanë gjetur ende trupin e Patricia-s, në prill të këtij viti në Gjykatën e Kërkuesit të Vdekjeve në Wakefield nisi një hetim zyrtar për vdekjen e saj. Kërkuesi i vdekjeve, Oliver Longstaff, shpjegoi se motra e Patricia-s, Christine Weatherhead, kishte kërkuar që të hapej një proces i ri hetimor për rrethanat e vdekjes së saj.
Bashkëshorti i Patricia-s, Keith Hall, ishte gjykuar më parë për vrasjen e saj, pasi dolën në dritë detaje për martesën e trazuar të çiftit. Megjithatë, në vitin 1994 ai u shpall i pafajshëm.
Në një intervistë tronditëse me një agjent policie të infiltruar, Keith pretendoi se kishte vrarë gruan e tij. Por juria nuk u lejua ta dëgjonte këtë “rrëfim” të regjistruar.
Më vonë, Keith u tërhoq nga deklarata e tij dhe tha se kishte pranuar se e kishte vrarë Patricia-n vetëm për t’i bërë qejfin të dashurës së tij të re, e cila në fakt ishte agjentja e infiltruar.
Sipas tij, ai donte ta bindte atë se Patricia nuk do të kthehej më dhe se të dy mund të vazhdonin lidhjen e tyre.
Në një intervistë me policinë, Keith tha:
“Kur u largova nga ajo makinë, doja të kthehesha dhe t’i thosha: ‘E di që ajo që të thashë është komplet një gënjeshtër, apo jo? E trillova të gjithën vetëm për të të bërë qejfin?’ Dhe në të vërtetë, duhej ta kisha bërë.”
Gjatë hetimit për vdekjen e Patricia-s u bë e ditur se, që prej zhdukjes së saj, nuk kishte pasur asnjë dëshmi se ajo ishte parë diku dhe nuk kishte asnjë “provë rrethanore” që të sugjeronte se ajo mund të ishte ende gjallë, si për shembull përdorimi i llogarisë së saj bankare apo ndonjë kontakt me familjarët.
Policia deklaroi se gërmimet në parking janë thjesht spekulative, ndërsa hetuesit po përpiqen të zbulojnë nëse ka ndonjë informacion apo provë që mund të ndihmojë në zbardhjen e fatit të saj.
Një zëdhënës i policisë tha:
“Oficerët e Ekipit të Rishikimit të Hetimeve të Rënda të Policisë së West Yorkshire aktualisht po shqyrtojnë një zonë në Fulneck, Pudsey, në lidhje me zhdukjen e Patricia Hall në Leeds në vitin 1992.
Kërkimi për prova të mundshme është ndërmarrë pas informacioneve të marra së fundmi nga ekipi dhe po zhvillohet mbi një bazë spekulative.
Nuk ka asgjë që të sugjerojë ndonjë lidhje me Kishën Moraviane, e cila është pronare e kësaj zone.”
Ndihmës shefja e policisë, Sarah Jones, tha se familja e Patricia Hall ishte informuar për zhvillimet e fundit.
“Jemi të vetëdijshëm për vëmendjen e kuptueshme të publikut që ky aktivitet pritet të tërheqë në këtë çështje të profilit të lartë.
Familja e Patricia-s është informuar dhe ne do t’i mbajmë të përditësuar.
Sigurisht që kemi detyrimin të veprojmë mbi çdo informacion të ri që marrim, por në këtë fazë po e mbajmë mendjen të hapur.” Ekipi i Rishikimit të Hetimeve të Rënda kishte kryer një hetim të plotë të dosjes së vjetër për zhdukjen e Patricia-s, i cili përfundoi vitin e kaluar pa zbuluar pista të reja hetimore. /PiranjatNews/
