Sali Berisha deklaron se Belinda Balluku duhet të ishte prapa hekurave dhe jo të ecte e lirë. Në një komunikim me gazetarët, kre...
BOTA
Nicki Minaj, nga skena e Grammy Awards në krah të Trump?! Videoja virale nga brenda Air Force One
PiranjatPërditësimi i fundit 26 Tetor 2026, 18:23
Reperja e famshme amerikane Nicki Minaj po tërheq gjithnjë e më shumë vëmendjen për afrimin e saj me presidentin Donald Trump. Artistja 43-vjeçare, e njohur për sukseset e saj në industrinë muzikore, është shfaqur këtë herë në avionin presidencial Air Force One, ndërsa një koment humoristik i një zyrtari të Shtëpisë së Bardhë ka nxitur spekulime për përfshirjen e saj në administratën amerikane.
Minaj udhëtoi të dielën, më 25 tetor, së bashku me presidentin amerikan drejt Michiganit, ku Trump mori pjesë në një tubim elektoral në prag të zgjedhjeve të mesmandatit të 3 nëntorit. Reperja publikoi në rrjetet sociale pamje nga brenda avionit presidencial, duke tërhequr vëmendjen e miliona ndjekësve të saj.
Megjithatë, ajo që shkaktoi më shumë reagime ishte një video e publikuar nga drejtori i komunikimit në Shtëpinë e Bardhë, Steven Cheung, i cili sugjeroi me humor se artistja mund të ishte sekretarja e ardhshme e shtypit e presidentit amerikan.
Në videon e publikuar në platformën X, Cheung zhvillon një intervistë joformale me Minaj, duke i drejtuar pyetje për Trump, ekonominë dhe zhvillimet politike në Shtetet e Bashkuara.
Gjatë bisedës, reperja shpreh hapur admirimin për presidentin amerikan, duke vlerësuar angazhimin e tij në drejtimin e vendit.
“Ai punon më shumë se njerëzit që kanë gjysmën e moshës së tij”, deklaroi Minaj.
Kur u pyet për sondazhet dhe rezultatet jo të favorshme për republikanët, artistja u përgjigj në një mënyrë që i ngjante një konference zyrtare për shtyp, duke vënë në diskutim rëndësinë e këtyre rezultateve.
Videoja u shoqërua me komentin e Cheung: “Zonja dhe zotërinj, mendoj se sapo gjetëm sekretaren e re të shtypit të Shtëpisë së Bardhë!”
Deklarata, ndonëse e bërë me humor, shkaktoi një valë reagimesh në rrjetet sociale, ku nisën diskutimet nëse këngëtarja mund të merrte realisht një rol në administratën Trump.
Vetë Nicki Minaj reagoi duke ripostuar videon, të shoqëruar me një flamur amerikan dhe një emoji, por pa dhënë ndonjë sinjal konkret se synon të marrë një detyrë qeveritare.
Ndërkohë, reperja nuk u mjaftua vetëm me udhëtimin në avionin presidencial. Ajo e shoqëroi Trump edhe në tubimin elektoral në Michigan, ku u shfaq e veshur me një kostum Gucci dhe shprehu mbështetjen e saj të plotë për presidentin amerikan.
“Shumë njerëz kishin filluar të humbnin shpresën. Që kur ai u kthye, ai ka ndryshuar energjinë e vendit tonë dhe na ka dhënë një të ardhme për të cilën të presim me padurim”, deklaroi artistja gjatë aktivitetit.
Minaj u shpreh gjithashtu se ndihej e nderuar që bashkëpunonte me Trump, të cilin e përshkroi si një shembull qëndrueshmërie dhe përkushtimi.
Nga ana tjetër, presidenti amerikan ka vlerësuar publikisht mbështetjen e artistes, e cila vitet e fundit është përfshirë gjithnjë e më shumë në debatet politike./PiranjatNews/
