Dy persona janë plagosur me armë zjarri mbrëmjen e sotme në zonën e Laprakës në Tiranë.
Ngjarja dyshohet se ka ndodhur ...
BOTA
Bëri selfie pasi vrau shokun e fëmijërisë, 35-vjeçari dënohet me burgim përjetë
PiranjatPërditësimi i fundit 4 Mars 2026, 18:41
Gjykata e Padovës ka dënuar me burgim të përjetshëm 35-vjeçarin Giacomo Friso, i akuzuar për vrasjen e mikut të tij të fëmijërisë dhe fqinjit Michael Boschetto, ngjarje e ndodhur më 27 prill 2024 në Villafranca Padovana.
Ai u urdhërua gjithashtu të paguajë një dëmshpërblim civil që do të përcaktohet përfundimisht në shumën 242 mijë euro.
Një nga elementët më tronditës të çështjes ishte zbulimi i një selfie-je të realizuar nga autori menjëherë pas krimit. Sipas hetimeve, pasi e kishte goditur katër herë me thikë viktimën, Friso i mori telefonin celular nga xhepi dhe realizoi një foto të vetes në vendngjarje.
Zbulimi u bë nga babai i 32-vjeçarit, i cili arriti të zhbllokonte iPhone-in e të birit gati një vit pas vrasjes, pasi pajisja iu kthye nga karabinierët. Mes imazheve, ai gjeti foton e autorit të dyshuar, i cili shfaqej duke bërë shenjën e fitores me një buzëqeshje tallëse. Fotografia u përfshi më pas në dosjen hetimore si provë.
Dinamika e ngjarjes Krimi ndodhi rreth orës 4:30 të mëngjesit të 27 prillit 2024. Sipas rindërtimit të prokurorisë, Friso – i njohur në zonë për probleme me varësinë nga droga – u paraqit në banesën e Boschetto-s, duke goditur me forcë në derë dhe duke e provokuar. Pas një përplasjeje fizike mes tyre, viktima u kthye në shtëpi i plagosur lehtë dhe doli sërish jashtë për të ndezur një cigare.
Në atë moment, Friso u rikthye i armatosur me një thikë kuzhine dhe e sulmoi me katër goditje, duke i shkaktuar plagë fatale. Sipas mjekut ligjor, vdekja e Boschetto-s ishte e menjëhershme për shkak të plagëve të rënda.
Pas krimit, 35-vjeçari tentoi të largohej, por u ndalua pak më vonë nga një inspektor i policisë lokale, i cili ndodhej jashtë shërbimit dhe ishte zgjuar nga zhurmat e konfliktit.
Dy ditë pas arrestimit, gjatë marrjes në pyetje, Friso pranoi se kishte konsumuar alkool dhe kokainë atë natë. Sipas prokurorit Roberti, ai deklaroi se fillimisht e kishte goditur Boschetto-n me grusht, duke e rrëzuar në tokë, dhe më pas kishte marrë një thikë nga hyrja e garazhit, duke e goditur me një sulm që rezultoi vdekjeprurës./PiranjatNews/
