Sali Berisha deklaron se Belinda Balluku duhet të ishte prapa hekurave dhe jo të ecte e lirë. Në një komunikim me gazetarët, kre...
BOTA
Përplasje të dhunshme në Spanjë/ Makina të djegura dhe barrikada në rrugë, 20 të arrestuar
PiranjatPërditësimi i fundit 26 Tetor 2026, 23:01
Të paktën 20 persona janë arrestuar pas trazirave të dhunshme që shpërthyen mbrëmjen e sotme në Bilbao të Spanjës, pas anulimit të një aktiviteti të planifikuar të aktivistit të ekstremit të djathtë, Vito Quiles.
Grupe personash me fytyra të mbuluara ngritën barrikada në rrugë, u vunë flakën automjeteve dhe koshave të mbeturinave, si dhe u përleshën me forcat e policisë. Sipas raportimeve të mediave spanjolle, mes të arrestuarve ka edhe shumë të mitur.
Sipas medias eldiario.es, trazirat nisën në zonën e Deustos, pranë universitetit me të njëjtin emër, dhe më pas u përhapën në pjesë të tjera të qytetit, përfshirë zonën përreth kullës Iberdrola, në anën tjetër të lumit.
Ministri i Sigurisë i Rajonit Bask, Bingen Zupiria, bëri të ditur se numri i të arrestuarve kishte arritur në rreth 20 persona. Megjithëse policia kishte dislokuar forca të shumta që në mëngjes për të parandaluar incidentet, disa njësi të policisë baske Ertzaintza ishin larguar nga zona të caktuara kur nisën trazirat.
Kur forcat e rendit u rikthyen dhe ndërhynë, disa pjesë të rrugëve ishin përfshirë nga flakët.
Nga protestat paqësore te barrikadat dhe zjarret
Tensionet nisën të përshkallëzoheshin rreth orës 18:30, kur disa grupe protestuesish qëndruan në zonën ku më herët ishin zhvilluar demonstrata kundër vizitës së Vito Quiles.
Shumë prej tyre kishin mbuluar fytyrat ose mbanin kapuçë. Pak pas orës 19:15, një flakë e madhe u vu re në bulevardin që mban emrin e José Antonio Aguirre, presidentit të parë të qeverisë baske.
Rruga u bllokua plotësisht për qarkullimin e automjeteve, ndërsa grupe personash zhvendosën kazanët e mbeturinave për të ngritur barrikada dhe hodhën fishekzjarrë.
Zjarrfikësit u thirrën për të përballuar disa vatra zjarri të njëpasnjëshme. Në flakë u përfshinë automjete të parkuara dhe një motoçikletë e Policisë Bashkiake të Bilbaos, e cila u përdor gjithashtu si barrikadë.
Situata shkaktoi ndërprerje të qarkullimit në disa rrugë të qytetit, ndërsa forcat e rendit ndërhynë për të vënë situatën nën kontroll.
